Shillong, K’lyngkot 24 : Ka Education Cell jongka Hynñiewtrep Youths’ Council (HYC) hynne ka sngi Thohdieng, kala kyntu ia ka sorkar jylla ban tuklar mardor halor ka jingpynslem man la ka snem ban pyllait ia ka Scholarship ki samla pule ka jylla, khamtam eh ia ka pre- matric bad post- matric scholarship hapoh jongka “Umbrella Scheme”.
Ha ka shithi ba la phah sha u Commissioner & Secretary ka tnad pule puthi Vijay Mantri, ka HYC kala ong ba kane ka jingpynslem kala ktah jur ia ka jingbteng ban pule jong kiba bun ki samla pule ha Jylla. Ka long kaba donkam ban pyllait ha ka por kaba biang ia ka scholarship ban pynthikna ba ki samla pule kin ioh ban bteng ia ka jingpule khlem ka jingmad ia kano kano ka jingeh ha kaba iadei bad ka jingioh ia ka pisa pilain.
“Ha ka jingtohkit bniah jong ngi lyngba ka Right to Information (RTI) Act na ka Ministry of Education, la pyntip ba ki daw jong kane ka jingpynslem kadei namar ka jingslem ha kaban aiti ia ki Utilization Certificate sha ka Ministry of Education. Ka Ministry kala buh da ka por ban aiti ia ki UC, kaba dei ha u bnai Nailur man la ka snem” kala ong.
“Ka long kaba donkam ba ka jylla kan bud ryntih ia katei ka jingbuh por ban pynthikna ba kan ioh pyllait ha ka por kaba biang ia ka scholarship. Ngi kyntu ia ka tnad jong phi ban buh hakhmat ia ka jingaiti ia kitei ki syrnod ban lait noh na ka jingpynslem ha kaban pyllait ia ka scholarship” bynrap ka HYC.
Ka HYC kala ai jingmut “Nalor kane ban shimkhia mardor halor kane ka jingpynslem, ngi tyrwa ban don noh ia la ka jong ka shnat Scholarship Cell hapoh ka tnad pule puthi. Kane ka Cell kan dei kaba shim ia ka jingkitkhlieh ha kaban khmih laitluid ia baroh ki kam ki jam ban pynthikna ba kan treikam bha” la ong ka HYC.
Ka HYC kala ong ruh , da kaba don ia ka Special Cell ka ban pynleit jingmut thik tang ha ka scholarship, ka tnad pule kan lah ban pynduna ia jingeh ha ka jingpynslem kaba la pynmih da ki heh ophisar kiba la khia lypa ia ka kam bad kiba don ruh ia kiwei kiwei ki jingkitkhlieh. Kane ka Special Cell kan pynbha ruh ia ka jingiadei bad ka jingiatreilang bad baroh kiba donbynta lang ha ka kam ha kaba iadei bad ka jingai ia ka Scholarship”.
 hynne ka sngi Thohdieng, kala kyntu ia ka sorkar jylla ban tuklar mardor halor ka jingpynslem man la ka snem ban pyllait ia ka Scholarship ki samla pule ka jylla, khamtam eh ia ka pre- matric bad post- matric scholarship hapoh jongka "Umbrella Scheme".){kind=link}