Shillong, Jan 23 : U Myntri ka pule puthi u Rakkam A Sangma hynne ka sngi Palei ula pyllait paidbah ia ki kot skul ba buh da ki QR Code (QR Code-Enabled Textbooks) jong ka sobjek Science bad Mathematics na ka bynta ka klas IX bad X ha jylla Meghalaya.
Kane kadei kaba la leh nyngkong eh ha ka thain Shatei Lam Mihngi jong ka ri India da ka jingthmu ban weng ia ka jingbym long ryntih ka jingpule hapdeng ki khynnah ka thain nongkyndong bad ki khynnah pule sor.
Ia kane ka jingpyllait paidbah la pynlong ha State Convention Centre, Shillong, ha ka jingiadonlang ki heh ophisar sorkar kiba kynthup ia u Bah HM Shangpliang, nongaibuit ka tnad pule puthi, u Ambrose Ch. Marak u Director ka Higher and Technical Education, u Swapnil Tembe u State Project Director jka Samagra Shiksha bad kiwei kiwei.
Haba kren ha ka jingialang u Rakkam Sangma ula pynpaw ia ka jingsngewnguh ia ka Meghalaya Board of School Education (MBOSE) kaba la lamkhmat ha kaban shim ia kane ka sienjam kaban wanrah ia ka jingkylla.
“Ka dei kaba rit hynrei ka long pat ka sienjam kaba shongkhia bad nga ngeit skhem ba kan ai jingmyntoi shibun bha ia ki nonghikai bad ki khynnah pule khamtam eh ia kito kiba don ha ki thain nongkyndong” ula ong.
Ula banjur ia ka jingdonkam kyrkieh ban kyntiew ia ki jingkylla ha ka pule puthi ha ka jylla.
“Lada ngi bteng ia kane ka rukom treikam katba kiwei pat ki jylla kila nang iaid shakhmat bad ngin ym lah ban beh ia ki. Kumta ngin hap ban trei shitom arshah ha ka rukom treikam bad ha ka mynsiem ka jong ngi”.
Ia kine ki kot QR Code la pynwandur na ka bynta ki khynnah pule haka klas IX bad X kaba kynthup ia ka jingpule kaba donlang ia ka rukom pule tynrai bad ka jingpyndonkam ia ki kor digital. Ka ai ia ki khynnah pule ia ka lad ba kin ioh ia ka jingbatai kaba bniah, ki bynta kiba lah ban iamirjingmut bad ki jingkylli kiba ju kylli da kaba shu Scan ia u QR code.
 kaba la lamkhmat ha kaban shim ia kane ka sienjam kaban wanrah ia ka jingkylla.){kind=link}