Shillong, K’lyngkot 23 : U Myntri Rangbah ka Jylla Conrad K Sangma ula pynpaw ba ka Sorkar jong u ka long kaba kloi ban iakren bad ki kynhun bapher bapher halor ki jingsngewkhia jong ki ia ka rai ka Sorkar ban thied bad pyllang jaka (land bank) na ka bynta ban kyntiew ia ka kam kynshew kam hapoh Meghalaya.
Haba kynthoh ia ka jingdawa ki Sengbhalang ban pynsangeh ia ka jingthmu ban thied bad pyllang jaka, u Conrad ula ong “Ngi long kiba kloi ban iakren ne ban kren sha ki hynrei ngam ong ba ngan sa buh ia ka tarik kaba ngan sa khot ia ki, em”.
“Ngim dei kata ka Sorkar ka ban ong em ngi lah dep rai bad ngin iaid beit shakhmat, ngin ym iakren shuh iano iano ruh, em. Ngi long kiba kloi ban iakren iano iano ruh kiba kwah ban iakren. Kino kino kiba don ka jingsngewkhia, sngewbha bann wan shakhmat, ngi long kiba kloi ban batai” ula bynrap.
Haba ban jur ia ka jingkongsan ban sngewthuh ia arbynta halor kane ka kam, u Conrad ula ong “Kaba nyngkong, ki land bank ki dei kiba la don naduh ki snem bala leit noh, kam dei shuh kaba dang thymmai kaba ngi leh. Ki dorbar bala leit kila leh ruh ia kane bad ngi shu pynbteng ia ka. Kaba ark a long ba ka jingkiew ka ioh ka kot bad ka jingpynkha ia ka iohkam iohjam, ki land bank ki dei kiba hap don bad kumta, khlem ki land bank ngin ym lah ban iohi ia ka jingkiew ka ioh ka kot kaba ngi donkam. Ban pynbiang tarajur ia baroh artylli ki bynta ka long kaba kongsan bad ngin pynthikna ba ngin pynbiang tarajur ia ki jingpynsngew jong ki paidbah hynrei ban khmih ruh ia ka jingkiew ka ioh ka kot ka Jylla”.
U Conrad ula ban jur ba ki land bank ki dei kiba kongsan bad ong “Namar khlem ki land bank kumno ngin kiew. Kumta, ka Sorkar ka hap ban thied ia ki jaka bad hangne ka Sorkar kan thied ia ki jaka. Hadien ba kala dep thied ia ka jaka, ngin ai wai pat bun sien ha kaba ka jingai wai kan long ia ki nongkynshew kam ki ban wan shakhmat”.
“Mynta ka jingkylli ka long ban thaw ia ki lad iohkam iohjam ia ngi. Kum ka Sorkar Jylla lada phi phai sha ka jingpynkha ia ka iohkam iohjam, lada phi phai sha ka jingkiew ka ioh ka kot, kan ym jia satia khlem ka jingwan kynshew kam ki riew shimet. Kumta, khnang ban pynsuk ia ki kam ki jam ba kin wan ki nongsengkam shimet, ngi donkam ia ki land bank, ngi donkam ban pynsuk ia ki kam ban wan kynshew ha ka Jylla jong ngi” ula ong.
U Conrad ula ong, “ Ki lah ban don ki jingsngewkhia bad ngi long kiba kloi ban iakren bad leh eiei ia kine ki jingsngewkhia hynrei haba phai sha ka nongrim treikam, khlem ki land bank, kumba nga ong ka dei kaei kaei kaba la dep jia naduh ki snem bala leit. Ha ki snem bala leit, bun tylli ki Sorkar kila wanrah ia ka land bank bad namar kine ki land bank mynta ngi la ioh ia ka jingkiew bha ha ka ioh ka kot”.
“Ka long kaba donkam ban kiew ka ioh ka kot jong ka Jylla bad hooid ki jingsngewkhia ki don beit kum ha kine ki khyndiat taiew bala leit, ki don ki jingsngewkhia ba kan ktah ia ka Land Transfer Act namar ka Investment Promotion Policy kaba ngi thaw. Ngi la leh eiei halor kane ka jingsngewkhia bad ngi la batai ia ki paidbah kumno ka polici jong ngi kan ym ktah ia kane ka bynta” ula batai.
