Shillong, K’lyngkot 23 : U Nongialam ka Mawlai Town Dorbar (MTD) bad Rangbah Shnong ka Mawlai Mawdatbaki Bah BR Kharmujai, ula ther tyngeh ia u kyrtong ka Voice of the People (VPP) na Mawlai bad kynthoh “Haba sngewthuh ba ym don bor, ynnai iakren ne ynnai mynjur kulmar”.
Kane ka jingkynthoh kala mih hadien ba ki Nongialam ka VPP kila byrngem ban tan ia ka MTD sha Iingkashari namar ka rai ban pynlong noh tang da ki rynsan common platform ha ka jingialap elekshon MDC, ka ban long la 21 tarik Rymphang, ym shuh da ki Public Meeting jong ki seng sain pyrthei.
Ka MTD ryngkat ki hynriew ngut ki kyrtong kiba la pynbna ban iakhun ia ka elekshon na Mawlai, kila iarai lang ha ka jingialang ba long ha ka sngi Balang, ba kin pynlong noh ia ki jingialap elekshon tang da ki common platform, ki ban long ha manla ki shnong jong ka Mawlai Pyllun.
Kine ki 6 ngut ki kyrtong kiba la iadonlang ha ka jingshim rai ki kynthup ia u kyrtong ka VPP Eddie Kharumnuid, kyrtong ka Congress Bah Wanseng Jyrwa, kyrtong shimet-MDC ba mynta Bah Teibor Pathaw, MLA barim Bah PT Sawkmie, Bah Seibor L Nonglait bad ka kong D L Nonglait na ka BJP.
Kane ka rai ka dei ruh kaba la shim haba buh hakhmat ia ka bha ka miat jong ki Khynnah Pule kiba dang don hapdeng ka jingialeh ia ki eksamin bapher bapher jong ka MBoSE bad NEHU, ki ban sdang naduh ka 10 tarik u Rymphang.
Kane ka rai jong ka MTD bad ki kyrtong, kala pynbitar lep ia ki nongialam ka VPP khamtam ia u President bad MLA ka Nongkrem Bah Ardent M Basaiawmoit, uba la kynthoh pyrshah ha ka jingialang kaba long ha Mookaiaw nalor kiwei kiwei ki nongialam kiba la kynthoh ha ki rynsan social media.
Haba kynthoh kylla, u Rangbah Shnong ka Mawlai Mawdatbaki ula ong ba u kyrtong ka VPP ula iadonlang ban shim ia kane ka rai.
Ula khyrwit tyngeh ia u kyrtong ka VPP bad ong “Kham tyngkan ka mynjur kulmar hapoh ka jingialang ioh da leit sha Iing shah kynroi ei ha ka lok ba dei u biej” bad bynrap “Haba sngewthuh ba um pat don ka bor, kan bha shibun ban ynnai kren, ynnai mynjur ruh. Ynnai ksan rympei rem sorbar bad ban nguid iala ka jong ka prie namar ka long kaba jah burom”.
 bad Rangbah Shnong ka Mawlai Mawdatbaki Bah BR Kharmujai, ula ther tyngeh ia u kyrtong ka Voice of the People (VPP) na Mawlai bad kynthoh “Haba sngewthuh ba ym don bor, ynnai iakren ne ynnai mynjur kulmar”.){kind=link}