Shillong Kyllalyngkot 23: Ka sorkar MDA kaba la ïalam da ka NPP kala pynlut palat T.1000 klur tam ka pisa ha ka jingshna ïa ki madan ialehaki ha kine ki 7 snem kiba la leit.
“Haduh T.1000 Klur la pynlut ha ki jingtei madan ialehkai naduh u snem 2018,” long u Myntri Rangbah ka jylla Conrad K Sangma haba ïakren bad ki nongthoh khubr hynne ka sngi Balang.
Ula ong ba ka jinglut jingsep kaba kot T.2 klur la ai jingïarap sha ki State Sports Associations man la ka snem bad sa kumba T.50 Klur la pynlut man la ka snem ha kaba iadei bad ka jingpynlong ïa ki jingiakob ialehkai, kynthup ïa ka T.8 Klur kaba la sam kum ka jingai jingkyrshan ïa ki nongialehkai.
Haduh mynta palat 300 tylli ki madan ialehkai la shna ha kylleng ki bynta jong ka jylla. Kila don 10 tylli ki rynsan iakob ha ka National bad ki International kiba la pynlong ha ka jylla naduh u snem 2022. Palat 2500 ngut kila iohkam lyngba kitei ki rynsan iakob kiba long man la ka snem.
Haba pynpaw ïa ki snem shwa ban shimti ka sorkar MDA, u Myntri Rangbah ula ong ba ki Sorkar ba lah leit ki ju ai hapoh T.100 Klur ka bhah ban tei ïa ki madan ialehkai bad kam shym la don than ka jingai ïa ki Grant sha ki Synjuk Ialehkai jong ka jylla.
“Kam shym la don kano kano ka jingwad ïa ka sap ka phong jong ki nongialehkai ne ka Talent Identification ne ki prokram ai jinghikai pyntbit kiba la bei tyngka da ka sorkar jylla, hynrei mynta, kila don palat ïa ka 24500 ngut kiba la iashimbynta haka prokram ban ithuh iaka sap ka phong kaba kyrpang.
U Myntri Rangbah ula pyntip ba ka sorkar kan shna ïa ka Football Stadium ka ban ngiam 40,000 ngut ki nongpeitkai ha ka jinglut jingsep kaba kot T.400 Klur ha Mawkhanu hapoh jongu snem 2028. Kane ka football stadium kan dei kaba heh duh hapoh ka ri.
“Ngin sa shna ïa ka Mawdiangdiang Sports Complex, kaban don ruh ïa ka Aquatics Complex bad ka Lawn Tennis Complex (ha ka jinglut jingsep kaba T. 150 Klur)” ula ong.
Ula ïathuh ruh ba palat ïa ka T.6 Klur la sam sha ki 3500 ngut ki nongialehkai bad ïa ki Coach lyngba ka Cash Awards Scheme bad palat ïa ka T2.5 Klur la sam sha ki 350 ngut ki nongialehkai hapoh jongka Sports Scholarship Scheme.
