Shillong, K’lyngkot 22 : U Myntri Rangbah ka Jylla Conrad K Sangma ha ka sngi Balang ula ong ba ka jingkyrpad jong ka Sorkar Jylla ban ai jaka lem na ki Shipai ha kaban pynkynriah ia ki 342 tylli ki longiing ka Them Metor na Them Iew Mawlong kaba iatakhuh ia katto katne ki jingeh namar ka jingdon ki kyndon treikam ba pyrrkhing jong ki shipai.
Haba iakren bad ki lad pathai khubor, u Conrad ula ong “Ki don katto katne ki jingeh hangtei. Lada phi kynmaw ngi la kyrpad ia ka Defence Ministry ban ai katto katne ka jaka kaba ki longtrai lane ha u pud u sam jong ki bad ngi la ioh ruh ia ka jubab na ki heh shipai hynrei ki don katto katne ki kyndon treikam, kiba don ha ki manual jong ki shipai, kiba la buh ha ka jingeh ba kin ai ia ka jaka”.
“Ki shipai ki don ia ki kyndon kiba pyrkhing bha ia ki kam tei jingtei kiba lah ban mih ha syndah jong ki jaka shipai bad kine ki jingpyrrkhing kila wanrah ia katto katne ka jingeh ia ngi mynta” ula bynrap.
“Naba ngim lah ban iakren pynkut lane shim rai ia kane ka kam, ngam kwah ban iakren eiei ia mynta, ka kam ka dang iaid, ngi dang iakren bad ngi kyrmen ban gin lap ia ka lynti hynrei nga sngew ba ka dang kloi palat kumba nga ong ba ki kyndon jong ki shipai ki kyllain bha bad ngi hap ban bud ia kine ki kyndon bad ngin sa peit shano ngi iapoi” ula ong.
