Shillong, K’lyngkot 22 : U Myntri Rangbah ka Jylla Conrad K Sangma ha ka sngi Balang, ula pyntip ba ka Sorkar Jylla kala pan ia ka jaka na ka Defence Ministry ba kan lah shna pynheh ia ka kad liengsuin ha Umroi kaba ki khot ka Shillong Airport.
Haba kren sha ki lad pathai khubor, u Myntri Rangbah ula pyntip ba ha ka jingleit Delhi jong u dang shen, ula iakynduh ia u Myntri kam iada ri bad iakren halor ka jingdonkam jaka jong ka Sorkar ban pynheh ia ka Umroi Airport.
“Kumba phi tip ba ki don katto katee ki bynta jong ka jaka ban pynjrong ia ka runway ka Umroi Airport ka hap ha ka jaka jong ki shipai bad ngi la iashong jingialang la bunsien bad ka Defence Ministry bad ka jingiakren kala mih ruh ba kumno ngin nang pyniaid shakhmat ia ka kam. Ia ki jingtip kiba bniah ngan sa batai hadien ba kiei kiei baroh kila shai” ong u Conrad.
Haba kylli, u Conrad ula ong “Ngai oh ia ka jubab kaba sngewtynnad na u Myntri iada ri bad ula pynpaw ba un ai ia ka jing kyrshan ba pura ha kat ki jingdonkam ka Jylla namar ka jingpynjrong ia ka runway ka long kaba kongsan ban wan hiar ki liengsuin kamai (A320) ha Shillong kham kloi kat kaba lah”.
“Ngi kyrmen ba ngin sa leh ban sdang noh ia ka jingpynjrong ia ka runway kham kloi bad nga kurmen ruh ba hapoh ka 12 haduh 15 bnai, ngin sa lah ban iohi ia ka jingwan hiar ka liengsuin kamai na Delhi ha Umroi Airport, ka ban long ka kam ban wanrah ia ka jingkylla kaba khraw ha ka liang ka kam jngohkai na ka bynta ka Jylla Meghalaya” bynrap u Conrad.
