Jowai, K’lyngkot 21: “Ka jingialehkai sports kam dei satia tang ka kam ban ioh takma; ka dei ka jingtei ïa ka jinglong briew, kaba hikai ia ka jingtrei shitom, bad ka kyntiew ïa ka jinglong ryntih bad janai,” ong u Myntri Rangbah ka Jylla Conrad K. Sangma hakhmat ki palat 15000 plus ki nongïalehkai kiba la ïalum lang ha madan ïalehkai Wahiajer Multi Sports Complex, Jowai ha ka sngi Balang na ka bynta ka jingïalang plie ïa ka 6th Meghalaya Games 2025.
Haba ai jingkren, u Myntri Rangbah u la pynbna ba kane ka sorkar kaba mynta ka ju buh ïa ki samla ka jylla hakhmat eh ha kino kino ki kam b aka leh, bad ka jingpynlong ïa kum kine ki lympung kan sei pyrthei ïa ki sap jong ki bad kan kyntiew bad pynjanai ia ka jinglah kum ki riew shimet.
“Ki samla ki dei ka bynta kaba kongsan bha ha ka jingthaw polisi jong ngi. Baroh ki skhim kiba ngi pyntreikam kyrpang eh na ka bynta kane ka Meghalaya Games, bad kumjuh na ka bynta ki saw tylli ki lympung ialehkai kiba la jia ha ka por jong kane ka sorkar ba mynta, ki pyni ia ka jingshimkhia jong kane ka sorkar ia ki samla ka Jylla ”, ong u Conrad.
Katba ki nongialehkai bad ka madan kaba don palat 15000 ngut ki nongpeitkai ki dang ia lum bad sngap ia ka jingkren u Myntri Rangbah ka Jylla, u la iasam ia ki jingai jingmut kiba bha, da kaba ong ba haba u briew u ialehkai bad iakynduh ia ki jingshah rem, u dei ban pdiang ia ka jingshah rem bad ban trei shitom ban pynjanai ia la ka jong ka sap.
“Ka jingïalehkai sports bad ka jingïashim bynta ha kum kine ki lympung ïalehkai ka dei shaphang ka jinglong ryntih, ka jingtrei shitom, ka jingpdiang ïa ka jingshah rem, ka jingioh jinghikai na kata ka jingshah rem, bad ka jingpynjanai ïa la ka sap… ka dei shaphang ka jingtei ïa ka jinglong briew,” u la bynrap.
“Ngi pynthikna ba ïa kine ki lympung ialehkai yn sa pynlong noh na kawei ka thain sha kawei pat manla u snem namar ngi ngeit ba man la ka thaiñ ka don ia la ka jong ka iktiar,” ong u CM .
Ka jingpynkylla ïa ki jaka pynlong ia ka lympung kan ym ai jingmyntoi tang ïa ki nongïalehkai hynrei kan ïarap ruh ïa ka roi ka par ban poi sha baroh ki bynta jong ki District jong ka jylla, u la ban jur.
Ka dei shaphang ka jingwanrah ïa ki nongïalehkai jong ngi sha ki bynta bapher bapher jong ka jylla… Ngi kwah ban tei ïa ka jingïatylli hapdeng ki briew jong ngi,” u la ong haba ban jur ïa ka jingdonkam ba ki nongïalehkai kin iakynduh bad iakren iakhana bad kiwei pat ki nongïalehkai.
U la ban jur ba ka rai ban pynkylla ia ki jaka pynlong ia ka lympung kan ai ka lad ïa baroh ki District ban ioh pynlong ïa ka Meghalaya Games.
“Ngi ngeit ba man la ka thaiñ, man la ka district, dei ban kyntiew bad ai ka lad ba kin pynlong ïa ka lympung ialehkai kiba kum kine. Da ka jingpdiang ïa kane ka jingïalehkai, shibun ki jingtei ki la jia ha ka thaiñ Jowai bad ha West Jaiñtia Hills hi baroh kawei,” u la bynrap.
Kiwei pat kiba la iadonlang ha kane ka jingialang plie ia ka Meghalaya Games ki kynthup ia ki Symbud Myntri Rangbah Bah Prestone Tynsong bad Bah Sniawbhalang Dhar, ki Mntri Sorkar Bah Shakliar Warkri, AT Mondal, Kong Ampareen Lyngdoh, Bah Comingone Ymbon, Working President ka MSOA Bah John F Kharshiing, Vice President ka MSOA bad Chairperson ka Reception Committee ka State Level Event Kong Matsiewdor War Nongbri bad kiwei kiwei.
Ha kane ka sngi la wan ruh ban sakhi ia kane ka lympung da u Ambassador ka Uzbekistan sha India Sardor Rustambaev.
