Guwahati, K’Lyngkot 16: Hadien ka jingjia ba sngewsih ha krem dewiong ha Umrangso, kaba la shim noh iaka jingim jong 4 ngut ki nongtih par bad ka jingjah rngai jong 5 ngut, ka Kynhun Myntri ka Sorkar Assam hynne ka sngi Palei, ka la pynbna ia ki lad jingiarap sha ki longiing kiba shah ktah bad ki jingtohkit halor kane ka jingjia ban pynthikna ba kum kine ki jingjia kin nym wan jia shuh.
Ka Sorkar Jylla Assam ka la kular ban ai jingiarap pisa kaba T.10 lak marwei sha ki bahaiing jong ki 4 ngut kiba la khlad noh bad T.10 lak sha 5 ngut kiba dang jah.
Kane ka dei kum shi bynta ban iarap iaki longiing kiba la duh noh iala ki nongkyrshan hala liang pisa pilain.
Ka Sorkar Assam kala pynbna ruh ban thung daka Judicial Inquiry ban lap iaka jingshisha halor ka jingjia kaba la jia ha Umrangso.
Ka Kynhun Myntri Sorkar Assam ka la thaw ia ka Judicial Commission kaba la khlieh da ka Justice Anima Hazarika, Nongbishar barim jong ka Gauhati High Court.
Ka Commission kan bishar bniah ia ki jingjia kiba don sawdong jong katei ka jingjia bad kan ai jingmut ban leh tyngeh ia ki ophisar, ki riew shimet bad baroh kiba don bynta ha kane ka kam tih dewiong beain.
Ka jingjia ba sngewsih ka pyni pyrthei ia ka rukom tih dewiong thliew khnai kaba shyrkhei, kaba dang iai bteng bad kaba buh jingma kaba khraw ia ki jingim briew bad ia ka mei mariang.
Ka Sorkar kan thaw ia ka rukom treikam lane ki Standard Operating Procedure (SOP) ban pynjari ia ka jingkhang tih dewiong thiew khnai ha kylleng ka Jylla.
La thaw ruh ia ka Special Investigation Team (SIT) ban tohkit ia katei ka jingjia, kat kum ka ejahar kaba la dep ban Register case.
Ka kynhun SIT kan treikam hapoh ka jingkhmih bniah jong Retired Justice Anima Hazarika, ban pynthikna ia ka jingkhuid jingsuba ha ka jingtjingtohkit.
Haba iadei bad pynduhjait iaka jingtih dewiong thliew khnai, ka tnat Mines and Minerals Department kan sa iatreilang bad ki bor Sorkar Pdeng ban wad bad khang lut ia baroh ki par dewiong thliew khnai kiba la don lypa hapoh ka Jylla.
Kine ki sienjam baka Sorkar Assam ka shim kidei ban pynduhjait ia ka jingtih dewiong thliew khnai bad ki jingma kiba iadei bad ka kam tih dewiong.
