Shillong, K’lyngkot 13: U Myntri ka tnad Sports & Youth Affairs u Bah Shakhliar hynne ka sngi nyngkong, ula pyllait paidbah ia Theme Song ryngkat bad ka Video bad kumjuh ia u Mascot “U Kiang” na ka bynta ka Meghalaya Games ha ka jingplie pyrda kaba la long ha District Library Auditorium, Mynthong, Jowai.
Ka theme song “Niom Beit Naphang” kala pynshongshit ia ka mynsiem jong ka jingiatylli hapdeng ki nongialehkai. U mascot “U Kiang” kadei kaba kdew ia ka mynsiem jong u nongiakhun ban pynioh laitluid.
Ha kane ka jingialang la iadonlang u MLA ka thain uba long ruh u Chairman ka MUDA bad u Nongaibuit ka District Level Organising Committee u Bah Wailadmiki Shylla, u Working President ka Meghalaya State Olympic Association (MSOA) u Bah John Kharshiing, ka Secretary jong ka sorkar jylla ka Kong Matsiewdor War Nongbri, u General Secretary ka MSOA u Bah Finely Pariat, u Deputy Commissioner u Bah B.S Sohliya, u Superintendent of Police u Bah C.Syrti, ki rangbah shnong na ki shnong bapher jong ka sor Jowai bad kiwei kiwei.
Haba kren ha ka jingialang u Bah Shakliar Warjrii ula banjur ia ka jingkongsna ban pynlut ia ka pisa ha kaban pynbiang ia ki jingdonkam ha ki kam ialehkai bad ban kyntiew ia ki samla bad ula ong ba ki kam ialehkai ki wanrah iaka jinglong kaba ryntih, kaba tei iaka jingling bad kaba wanrah ia ka jingiatylli hapdeng ki samla.
Ula ong ba ka sorkar jylla kala buh hakhmat na ka bynta ban shan ia ki jingtei bapher ha kaba iadei bad ki kam ialehkai bad kumjuh ban bei tyngka ia ki Sports Association ha ka jylla.
U Bah Shakliar ula pynpaw ba la sorkar ka pynleit jingmut ha kaban pyndonkam ia ki jingdonkam kiba la don lypa ha ki skul bad college, ha ka jaka ban tei ia ki jaka ialehkai kiba thymmai, da kaba buh ia ka thong ban pynbha shuh shuh ia ki jaka ialehkai kiba la don lypa namar ba kane ka jingpynlut pynsep kan iarap shibun ia ki jaka pule, ki shnong ki thaw hadien ba la kut katei ka lympung iakob ialehkai.
Ula batai ruh shaphang ka jingiohi jngai jong ka sorkar jylla ban pynkup bor ia ki samla ba kin kiew shaphrang ha ki kam ialehkai ym tang hapoh ka jylla hynrei wat ha ki rynsan iakob kiba long hapoh ka ri. Da kaba pdiang ia ka jingdon ia ka jingkylla kiba lah ban shim por bha ban pynurlong ia ka jingthmu hynrei ula iengskhem ba ka sorkar kan shimkhia ban saindur ia ki nongialehkai bad ba kin kiew ha man la ki liang.
U Myntri Sorkar ula iaroh ruh ia ka jingtrei shitom jong ki ophisar sorkar, ki nongialam shnong bad ki kynhun jong ki shnong ki thaw ha kaban kyrshan ia ka jingiohi jngai jong ka sorkar bad ula kitbok kitrwiang ia baroh ki nongialehkai kiba iashimbynta ha kane ka lympung ialehkai.
Hadien kane, u Bah Shakliar Warjri ryngkat u Bah Wailadmiki Shylla bad ki nongpyniaid kila leit ban jurip ia ki katto katne ki jaka ialehkai ban peit ia ka jingling jingman ha ka rukom pynhreh na ka bynta ban pynlong ia ka National Games kaban wan.
Ka kynhun Elev8 Tribes Choir kala rwai ar tylli ki jingrwai kaba la pynsngewtynnad ia baroh kiba la wan ban sakhi ia kane ka jingialang.
