Shillong, K’lyngkot 11 : U President ka Congress ha Jylla Bah Vincent H Pala ha ka sngi Saitjain, ula dawa ia ka Voice of the People Party (VPP) ban kren shai ia ka nongrim jong ka – la ka kwah ban wanrah ia ka Article 371 lane ban pynkhlain ia ka Sixth Schedule hapoh ka Jylla Meghalaya.
Haba iakren bad ki nongthoh khubor, u Bah Pala ula ong “Ka VPP ka dei ban kren shai halor ka jingthmu jong ka. La ka kwah ban iada ia ka riti dustur bad ka jingleh tynrai ba riewspah ki Jaidbynriew trai Jylla lane ka kwah ban bujli noh ia ka Sixth Schedule sha ka Article 371 khnang ba ki paidbah kin dup ioh ai ia ka rai kaba shai (ha ka elekshon MDC ban wan).
“Ngam don jingujor pyrshah ba ki mih iakhun ia ka elekshon MDC hynrei ki dei ban kren shai lada ki jop, la kin wanrah jingkylla lane kin nang tyngkai bad iada ia ka riti dustur bad ka tynrai ba riewspah jong ngi namar ki nongialam (VPP) kila wanrah ia ka Bill bad iaid kylleng ki jaka ban ong ba ki kwah ia ka Article 371 hynrei mynta pat kila iaid ialap ia ka elekshon MDC. Ki dei ban kren shai la ki kwah ia ka Sixth Schedule lane ka Article 371” ula bynrap.
Haba pynpaw ba ka Article 371 ka iapher bak ly bak bad ka Sixth Schedule, u Bah Pala ula ong ‘Hapoh ka Article 371, ka bor ka shong ha ka Sorkar Jylla hynrei kat kum ka bor jong ka Sixth Schedule haba iadei bad ka riti dustur, ka tynrai, bad ka hok halor ka khyndew ka shyiap ka hap hapoh ka jingkhmih ki District Council. Ia ki District Council la pynkha kat kum ki kyndon ka Sixth Schedule (ban iada ia ka hok bad ka bha ka miat ki riewlum trai Jylla bad ia ka Khyndew ka shyiap jong ki).
Ha kajuh ka por, u Bah Pala ula kyntu ia ki nongthep vote ka Ri-lum Khasi bad Jaintia ba kin shim rai la ki kwah ban shah ia ka jingpynduh noh ia ka bor jong ki Khlieh Nongsynshar Shnong, Hima sha ka Sorkar Jylla.
Ula kdew ruh ia ka jingwadbniah jong ka Congress bad ong “Ngi shem ba ka Sixth Schedule ka kham khlain bor ban ia ka Article 371. Wat ha Ladakh, Jammu & Kashmir bad Arunachal, ki kwah ban pyntreikam ia ka Sixth Schedule ha ki jaka, kiba la treikam lypa ka Article 371”.
“Ta ka daw ki paidbah kin hap ban rai la ki kwah ban pynduh noh ia ka bor jong ki Rangbah Shnong sha ka Sorkar Jylla lane ki kwah ban pynthikna ba ki Khlieh Nongsynshar kin iai neh hapoh ka jingkhmih ki District Council. Ki paidbah ki dei ban ai ia ka rai namar lada ki vote ia ka VPP, ki lah ban wanrah ia ka resolution (ban pyntreikam ia ka Article 371), nga te ngam tip” bynrap u Bah Pala.
Haba pynpaw ba ka Congress te ka jied ban pynkhlain ia ka Sixth Schedule hapoh ka Jylla, une u Khlieh ka Congress ula ong “Namar kata ngi ban jur ia ka jingdonkam ban nang wanrah shuh shuh ia ki ain ban iada bad nang kyntiew ia ka riti dustur bad ka jingleh tynrai ba riewspah jong ngi ki riewlum lyngba ki kyndon jong ka Sixth Schedule ka Riti Synshar ka Ri India”.
.){kind=link}