Shillong, K’lyngkot 08 : U Nongshonghnong ka Jabbar, East Khasi Hills Bah Rojen Khyllait, ula kyntait ia ka jingkynnoh jong ka Hynniewtrep Youth Council (HYC) Sohiong Circle bad Nongthliew Circle ba u lum commission na ka kam iadie iathied jaka sha ka project Shillong Western Bypass.
Ka HYC kala kynnoh ba u Bah Khyllait ula dawa hapdeng 10% haduh 30% ka Commission na ki nongshongshnong na ka bai die jaka ban shna ia ka surok 2-lane jong ka Shillong Western Bypass.
“Ngam dei u land mafia (mafia jaka) “ ong u Bah Khyllah bad bynrap “Ngim ju donkti ha kum kine ki kam bad ka HYC ka dei ban sngewthuh ba ngim don ia ka bor ban shim rai halor ka jingsiew bai jaka”.
U Bah Khyllait ula kyntait ruh ba ula shim ia ka blank cheque na ki nongioh jingmyntoi na kane ka surok. “Kane ka dei kaba shu thaw hi” ula ong.
“Nga ju pynshlur ia ki trai shnong ba kin pyndonkam ia ka surok 2-lane ha ka lynti kaba dei bad ngam don eiei ban ioh nong na ka jingdawa pisa na ki” ula ong.
Ka HYC kala ujor pyrshah ia u Bah Khyllait bad Phridensing Thabah ha ka 6 tarik Kyllalyngkot sha ka Deputy Commissioner ka East Khasi Hills, ba kynnoh ba kila dawa pisa na ki nongshongshnong ba kin ioh ia ka jingsiew bai jaka na ka bynta ki jaka bala ai sha ka bypass. U Bah Khyllait ula kynnoh ia kine ki jingkynnoh bad ong ba ki dei kiba khlem nongrim bad kiba ialam bakla.
“Ka surok bypass 2-lane ka dei na ka bynta ka jingmyntoi jong ki paidbah baroh bad nga ju kyrshan bha ban pyntrei ia kane ka project” ula ong haba bynrap “Nga kyntu ia ka HYC ba kan wad ia ka jingshisha bad ym ban shu kynnoh khlem nongrim kaba lah ban ktah ia ka burom ka ijot jong u”.
Haba kylli halor ka jingkynnoh ka HYC ba ula shim ia ka pisa na ki arngut ki trai jaka, u Bah Khyllait ula ong “Lada nga la shim ia ka pisa, kumno ki lah ban ong ba nga la shim ia ka pisa namar kane ka kam? Ka lah ban dei na ka bynta ki kam shimet”.
Ula kyntait ruh ia ka jingkynnoh ba ula byrngem ia ki nongshongshnong ban phah pyniaid noh nawei ia ka surok lada kim siew ia ka pisa ia u na ka jingsiew ba ki ioh na ka jingdie jaka. “Ngam don eiei ban ong. Nga la ieh ha ka ain ba kan khmih bad wanrah ia ka jingshisha” ula ong.
U Bah Khyllait ula maham ba lada ka HYC ka don jingthmu ban leh eiei pyrshah ia u, un shim ia ka lynti jong ka ain pyrshah ia ki.
