Guwahati, Kyllalyngkot 02: Ka jingbthei jong ki pipe um kiba pynbiang ia ka umbam lyngba ka JICA kala jia biang ha ka nongbah Guwahati, ha ka thain Kharghuli bad kane ka jingjia kala pynmih ia ka jingshlei um bad ka jingpynlehnoh ei kai ia ka um da ki hajar litar.
Kane ka jingjia kadei kaba la jia biang mynta ka kynti ha katei ka juh ka jaka, ha kaba ha u bnai Jymmang 2023 kala don ka jingpait jong u pipe um bad kala wanrah ia ka jingjulor ha katei ka thain.
Katkum ka jingiathuh jong ki nongshong shnong, kila ong ba katei ka jingjia kala jia ha ka step jong ka sngi Palei bad bun tylli ki iing kila shah pynjulor na ka jingbthei kynsan jong u pipe um uba kongsan bha ban sam ia ka umbam umdih.
Ki paidbah kila pynpaw ia ka jingbynniaw halor kane ka jingjia biang jong ka jingbthei u pipe bad kila kyntu ia ki bor kiba dei khmih ba kin shimkhia mardor bad ban shim ia ki lad ki lynti ban weng ia katei ka jingeh bad ia kano kano ka jingjia nangne shakhmat.
Hynrei na ka liang jong ki heh ophisar ka JICA bad ki pulit pynlip ding kila wan poi sha katei ka jaka bad kila lah ban tehlakam ia ka jinglong jingman.
