Nongpoh, Nohprah 18: U MLA ka Umroi Bah Damanbait Lamare, ula kular ban treishitom kumno ban ioh kyntiew kyrdan noh ia ka Umroi Sub Centre sha ka PHC, kaba la kynjoh mynta la palat 50 snem tam.
Bah Lamare u la pynpaw ia kane ha ka jingrakhe ia ka lyngkhuh dap snem kaba 50 (Golden jubilee)jong ka Umroi Sub Centre, kaba la long ha Umroi hynne ka sngi Balang.
“Kum u nongmihkhmat paidbah, nga ai ka jingiaroh kaba khraw bad ai khublei kyrpang ruh ia baroh ki nongtrei ka Umroi Sub Centre, kiba la shakri ia u paidbah ka thaiñ Umroi mynta la palat 50 snem hapdeng shibun ki jingeh bad ki jingtynjuh. Ka pork a la dei ban kyntiew kyrdan noh sha ka PHC”, ong u Bah Lamare.
Ha kane ka sngi, ka Sub Centre Umroi ka la pynlait paidbah ia ka Souvenir ha ryngkat ka jingpynkup burom ia ki nongtrei kiba la shakri paidbah khlem da kynran dien ia ki jingeh ba ki mad.
Kiba la iadon lang ki kynthup ia u Bah R. Kharbuki, MDC ka Umroi, u Raja Brahma, Project Director ka DRDA, ka Dr. AJ Syiemlieh, District Nodal Officer nalor ki riew rangbah ka thaiñ Umroi ba kynthup ia u Bah PB Sylla.
