Nongpoh, Nohprah 14 : Ka Jylla Meghalaya shen kan sa iohi ia ka jingmih jong kawei ka Park kaba kham pher bad ba phylla na baroh-ka ban sa tei bad pynwandur tang da ki jingthung jingtep ba ai da ka mariang.
Kane ka park kan dei kaba tei tang da ki siej bad yn tip ia ka da ka Bamboo Park, ka ban don hapoh u pud u sam jong ka Dorbar Shnong Mawtnum, Ri-Bhoi District.
U Chairman ka Meghalaya Industrial Development Corporation (MIDC) James PK Sangma, ula buh mawnongrim hynne ka sngi Saitjain ban sdang pyntrei noh ia kane ka park.
Lah ban kdew, ba kane ka Bamboo Park ka dei ka jingiohi jngai jong ki nongialam shnong ka Mawtnum hapoh ka jingialam da u Rangbah Shnong Bah Badhok Nongmalieh, da ka jingangnud ban kyntiew ia ka kam jngohkai khlem da pynjulor ia ka mei mariang, ban plie ia ka lad iohkam iohjam bad ban kyntiew ruh ia ka ioh ka kot jong ki paid nongrep ka them Ri Bhoi District.
Haba ai jingkren ha ka jingialang buh maw nongrim, u James K Sangma u la ai ia ka jingiaroh ia ka sienjam bad ka jingiohi jngai jong ki nongialam shnong ka Mawtnum haba iohi ba ka Ri Bhoi District ka dei kaba pahuh bha ka jingdon jong ki siej hapdeng ki khlaw ki btap ba rben.
U la ong ruh, ba ka jingiatreilang hapdeng ki nongshong shnong bad ka Dorbar Shnong ka long shisha kaba donkam bha ban pynjop ia kano kano ka jingthmu kaba bha namar lyngba kane ka jaka jngohkai pyrthei ym tang ba kan khring ia ki nongwan jngohkai pyrthei hynrei kan kyntiew bad pynmyntoi hi ia ki nongshong shnong, ki samla bad ka ioh ka kot jong ki.
U James u kular ba na ka liang ka tnad MIDC kan ialeh katba lah ban ai jingiarap na ka bynta ban pynurlong ia kane ka jingthmu jong ka Dorbar Shnong ka Mawtnum ban tei ia ka Ri Bhoi Bamboo Park.
Na ka liang u Rangbah Shnong Bah Badhok Nongmalieh, u la pynpaw ba ka thong ba hakhmat eh jong kane ka Bamboo Park ka long ban kyntiew ia ka Shnong ha ka kam jngohkai pyrthei bad ruh ka lad aikam aijam ia ki samla nalor ka ioh ka kot jong ki nongrep.
U la iathuh ruh, ba ha kane ka Bamboo Park kin don ki jingtei kumba 10 haduh 11 tylli, kiba kynthup naduh ki karkhana pynmih ia ki tiar ba saiñ na u siej, ki Training Centre, ki jaka sah jong ki nongwan jngohkai pyrthei bad kiwei kiwei ia kiba yn shna da kaba pyndonkam hi da ki siej kiba mih na kane ka district.
Kiba iadonlang ha kane ka sngi ki kynthup ia u Dr. Celestine Lyngdoh, MLA ka Umsning, u Additional Deputy Commissioner Bah MB Tongper, U Bah DD Nongmalieh, Managing Director ka MIDC Ltd, MLA barim ka Mawhati Bah Donbok Khymdeit, MDC barim ka Umsning Bah Donkupar Sumer nalor kiwei kiwei ki riew rangbah bad nongshong shnong ka Mawtnum.
