Pyrshah ka FKJGP ban pynlong Agent khaii jaka ia ka IMA ban seng karkhana ha Jylla

Shillong, Nohprah 14: Ka Federation of Khasi Jaintia & Garo People (FKJGP) ha ka sngi Thohdieng, kala pyrshah jur ia ka jingthmu jong ka Sorkar Jylla ban pynkup bor ia ka Investment Meghalaya Agency (IMA) ba kan thied ia ki jaka puta ha Jylla ban ai pat sha ki nongseng karkhana hapoh ka Jylla.

Kane ka jingpyrshah kala mih halor ka rai jong ka Sorkar ban pynkylla thymmai (Amendment) ia ka Meghalaya State Investment Promotion & Fecilitation Act, 2024, kaba aibor ia ka IMA ba kan thied jaka bad ai pateng sha ki nongseng karkhana ha Jylla.

“Ka FKJGP ka pyrshah jur iaka jingthmu ban wanrah ia kum kane ka Amendment. Ngim lah ban pdiang da lei lei ruh. Kane ka dei ka kyndon ka ban pyniap ia ka jingmut ba shisha jong ka Meghalaya Land Transfer Act-ka Ain kaba iada ia ka hok longtrai ia ka khyndew ka shyiap jong ki paid riewlum trai Jylla ka Meghalaya” ong u Bah Eldie Newton Lyngdoh, General Secretary ka FKJGP.

Kat kum ka jingong jong u, “Ka jingailad ia ka IMA ba kan thied jaka kan mut ruh ka jingduhnoh suki pa suki jong ki trai riewlum ka Jylla ia ka hok longtrai halor ka khyndew ka shyiap”.

U Bah Eldie ula buh jingkylli da kaba ong “90-95% ki jaka ha Meghalaya ki dei kiba hap hapoh ka Sixth Schedule, kumno ka Sorkar kan wanrah ia kane ka Amendment khlem ka jingiasyllok jong ki District Council, ki Hima, ki Dorbar Shnong bad kiwei kiwei”.

Une u Nongialam ka FKJGP ula ong ba ka Meghalaya State Investment Promotion & Facilitation Act (MSIPF), ka dei kaba la wanrah ban pynsuk ia ka jingwan sengkam sengjam ha Meghalaya bad kan kyntiew ia ka jingkiew shaphrang ka Jylla nalor ka lad aikam aijam ia ki samla trai Jylla.

“Hynrei “ban pynsuk ia ka jingwan seng kam seng jam, kam mut pat ba ngi ki trai muluk ngin iapein ia ki jaka puta bad ia ka hok longtrai halor ka khyndew ka shyiap. Phi lah ban pynsuk ia ka jingwan sengkam sengjam hynrei ka dei ban don da kiwei pat ki lynti ym ban die duh ia ki jaka puta” ula kynthoh.

Haba kren halor ka Meghalaya Industrial & Investment Promotion Policy (MIIPP), 2024, u Bah Eldie ula kynthoh “Kane ka policy kala kren halor ka jingthungkam haduh 90% ia ki trai shnong ha ki kam Non-Manegerial bad 50% ki trai shnong ha ki kam Managerial. Ka policy ka dei kaba biang eh hynrei kumno ngin shaniah ba ka policy kan treikam kumba la buh ia ka”.

“Ngi sngewthuh ba kane ka policy ka dei kaba thymmai kaba tyrwa aikam ia ki samla ha ki karkhana ba dang seng thymmai. Hynrei, ngi la sakhi da ki phew snem ia ka Industrial Policy ka Sorkar kaba tyrwa aikam ia ki samla trai Jylla ha ki karkhana ba seng ha Jylla. Ki karkhana kila mih da ki spah tylli hynrei mano ba iohnong pat. Katno percent ki samla jong ngi, ki iohkam ha kine ki karkhana kam pher la ki dei ki Unskilled, Semi Skilled ne Highly Skilled”. Ula ong haba bynrap “Kaei kaba jia ha ki snem bala leit noh, ka pynartatien ia ngi ban shaniah ha kane ka Policy ba thymmai”.

U Bah Eldie ula dawa ia ka Sorkar Jylla ba kan pynsangeh syndon ia kane ka jingthmu ban wanrah ia ka Amendment bad ban pyrkhat pat da kiwei ki lad ki lynti ki ban long ka jingmyntoi bad jingiohnong ia ki trai muluk khlem da iapein ia ka khyndew ka shyiap.