Shillong, Nohprah 12: Ha ka jingbym lah ban mutdur ba u Phadar Krismas ne u Santa Claus uba ju riam saw hynne ka sngi ula riam da ki jain kiba jyrngam ha ka Winter Tales Festival kaba 5 ha nongbah Shillong.
Ka khubor na u Santa Claus ka long kaba shai : Leh ia ki kam ban iada bad sumar ia ka mei mariang.
Kane ka tamasa kaba ialeh ban kyntiew ia ka kam jngohkai bad ia ki sienjam kiba iadei bad ka mariang, kala long ka jingailad kaba biang bha ia u Santa Claus ban ai ia ka khubor kyrpang jongu.
Ha ka jingiakren bad ki paidbah, u Santa Claus ula ban jur ia ka jingkongsan ban iada ia ka mariang bad ban shim ia ki lad ki lynti ban leh ia ki kam ban sumar ia ka mariang.
“Nga lah peit bha ia ki khynnah ha kylleng jong kane ka pyrthei da ki spah snem bad ka long kaba pait dohnud ban iohi ia ka jingshah ktah na ka jingpynjaboh bad ka jingkylla ka suinbneng ha kane ka pyrthei” ong u Santa Claus.
“Dei halor kane, nga ialeh ban pynsaphriang ia ka khubor ban leh ia ki kam kiban iada bad sumar ia ka mariang bad ban im ia ka jingim kaba iai neh. Man la ki mawjam kiba rit bad da ka jingtreilang yn lah ban wanrah ia ka jingkylla kaba khraw” ula bynrap.
