Ioh jingithuh ka Meghalaya ha ka jingpynkylla thymmai ia ka rukom sam marbam

Shillong, Dec 5: Ka jylla Meghalaya ka la ioh ia ka jingithuh kum ka Jylla kaba lamkhmat ha ka jingpynkylla ia ka rukom sam marbam paidbah (PDS), kaba la ioh ia ka jingiaroh ha ka ri ha ka jingialang pyllait paidbah ia ka “Anna Chakra”, ka atiar ban pynbha ia ka rukom sam marbam.

Ia kane ka jingialang, ba la pynlong da ka tnad bam bad sam paidbah, ka Sorkar India, la plie da u Pralhad Joshi, u Myntri ka tnat Consumer Affairs, Food and Public Distribution, and New and Renewable Energy ka Sorkar Pdeng.

Ka jingithuh ka pyni ia ki jingpyrshang jong ka Meghalaya ban pynlong ia ka jingsam marbam (PDS) kaba kham shai, kaba kham sted, bad kaba don ka jingkitkhlieh, ban pynthikna ba ki marbam kin poi kloi sha ki nongioh jingmyntoi.

U Pravin Bakshi, IAS, Commissioner bad Secretary ka tnad Food Civil Supplies & Consumer Affairs ka Sorkar Meghalaya u la ïaroh ïa ki ophisar kiba aiti lut bad trei shitom ban wanrah ia ki buit treikam ba thymmai. Ka Tnad kala lah ban pyntrei kam da ka jingjop ia ka server ba dang shu pynthymmai tang hapoh ka saw sngi, kaba u ai jingiaroh sha ka jingaiti lut jong ki Ophisar bad jingiatreilang bad ka World Food Programme, IIT Delhi, and NIC.

U Myntri ka tnad sam marbam Bah Comingone Ymbon u la iaroh ia ka kynhun kaba la buh ia ka jylla Meghalaya kum ka nuksa ha ka ri ha ka jingpynkylla ia ka PDS. “Kine ki jingpynbha kim pynbha tang ïa ka jingshakri hynrei ki pynpaw ruh ïa ka jingaiti jong ngi na ka bynta ka jingbha jingmiat jong ki nongshong shnong jong ngi,” ong u Ymbon.