Shillong, Nohprah 03 : Ka Dorbar Shnong Mukroh Pyllun ha ka sngi Ba-ar, kala kyntu ia ka Sorkar Jylla ba kan tuklar halor ka jingkynnoh wan kyntur pud jong ka Karbi Anglong Autonomous Council (KAAC) shapoh u pud u sam ka shnong Mukroh kaba hap hapoh ka Laskein Block,West Jaintia Hills District.
Ka kynhun ki Khlieh Nongsynshar Shnong kila wan iakynduh bad aiti ia ka dorkhas sha u Symbud Myntri Rangbah ba khmih ia ka kam Pohiing Bah Prestone Tynsong bad Symbud Myntri Rangbah ba khmih ia ki kam pynroi sor Bah Sniawbhalang Dhar halor kane ka kam.
Ka Chairman ka Shnong Chilangki Phawa ula kynnoh ba ka KAAC kala iai bteng ban kyntur shapoh u pud u sam jong ka shnong Mukroh.
“Kat kum ka jingpynbna ba 25 tarik Risaw, 1968 bala pynbna da ka Ophis ka Jaintia Hills Autonomous District Council (JHADC), ki jaka jong ka shnong Mukroh ki hap shaduh ka Elaka Labang Nongphyllut/Block-I lane ka shnong Moikoilum. Hynrei ka Jylla Assam kala kyntur sha u pud u sam ka Mukroh mynta la katto katne snem bad pynieng ruh ia ka Forest Beat House hapoh ka shnong Mukroh” ula ong.
Ula ong ba ki nongshongshnong ka Mukroh ki shaniah ban ioh dieng thang ban shet jingshet bad kiwei kiwei,da kaba leit lum iaki dieng n aka khlaw jong ka Shnong kaba long naduh kulong kumah. Hynrei, mynta kila hap pyrkhat arsien bad sheptieng ban leit lum dieng thang na ka khlaw jong ka Shnong namar ka jingwan kyntur pud ka KAAC. Ka KAAC kala khang ia ki trai shnong ban lum dieng thang haba kam ba ka khlaw ha Mukroh ka dei ka jong ki, ula bynrap.
U Bah Phawa ula kynnoh ba ha u bnai Risaw, ka KAAC kala pom iau dieng ban shna ia ka surok ha Salang, Mukroh da ka jingthmu ban pynkylla kper slasha ia ka jaka bad ka Dorbar Shnong Mukroh kala shim ia kane ka jingleh ka KAAC kum ka kam wan kyntur pud sha ki jaka ka Mukroh. La pyntip ruh sha ki bor District ka West Jaintia Hills halor ka jingwan shna beain ia ka surok ha ka thain.
“Watla ki bor District na West Jaintia Hills kila leit jurip ia ka jaka bad pynsangeh ia ka kam, u contractor, u khlem burom satia ia ka ain bad iai byeng ban shna ia ka surok tang mar syn mih u magistrate na shnong Mukroh” ula ong haba kyrpad ia ka Sorkar Jylla ban ai ia mka bor pahara kaba khlain ban khanglad ia ki kam beain, ka jingshna surok bad ka project kper shna ha Salang, Mukroh da ka KAAC.
