Shillong, Nohprah 03: Ka Malki SC kala ioh rah iaka Trophy bad ka song pisa ba T.2 lak kum ka lahduh haka Shillong Sports Association’s (SSA) First Division 2024 ha ka jingialang ha madan ialehkai SSA First Ground, Polo.
Lah ban kdew ba kane 28 tarik u Naiwieng da ka jingïalehkai ba khatduh jong ka round robin namar kumba long ha ka Shillong Premier League, ym shym la don satia ka Playoffs bad kano kano ka kynhun kaba bat iaka kyrdan nyngkong (khlieh duh) jong ka thup hadien ka jingïakhun jong ka round robin ka kylla long ka nongjop.
Ka Malki ka la pynkut iaka Shillong Sports Association’s (SSA) First Division 2024, da kaba jop 7 sien bad shah rem 2 sien, bad kamai 21 poiñ baroh katba ka Mylliem SC kaba bat kyrdan ba-ar kala la khur 18 poiñ na ki 6 sien jop bad lai sien rem, bad baroh ar tylli ki kynhun kin kiew sha ka Shillong Premier League ha u snem 2025.
Kane kan long ka jingwanphai biang jong ka Malki, kaba la shah pynhap noh na ka SPL ha kaba kut jong u snem 2022, bad kan dei ka samoi kaba nyngkong naka bynta ka Mylliem.
Ka Mylliem kala khur iaka song pisa ba T.1 lak kum ka nongjop ba ar.
Ka song pisa mynta u snem kala kham heh bad kane kadei shi bynta ka jingthmu jong ka SSA ban pynbha ïa ka kyrdan ïalehkai ha ka madan ïalehkai.
La sam ruh ïa kawei ka khusnam ‘Top Scorer’ jong ka First Division sha u Wallambha Kharpran jong ka Sohryngkham SC uba la thep 9 kol watla une u Top Scorer u la wan na ka klob kaba dei ban shah pynhiar kyrdan namar ka Sohryngkham ka la wan ba-ar na trai duh, halor ka Umphyrnai SC haka thup.
Kine ki ar tylli ki klob kin ïakhun ha ka Second Division jong u snem ban wan.
Ha kane ka prokram la donlang ki dkhot ba la kham rangbah jong ka SSA, ha kaba la ïalam da u Working President ka SSA u Bah Robert Dkhar.
Ka Association ka la shim ruh ia ka kabu ban pynkupburom ïa u Referee Kynsanphar Lyngdoh Nongum uba la ioh rung sha ka AIFF Elite Panel of Referees bad ruh ka la pynkupburom ia ka kynhun U-14 bad U-16 jong ka SSA kiba la iashim bynta ha ka Meghalaya Youth League.
Ki khynnah shynrang U-16 ki dei ki champion ha ka kyrdan jong ki, katba ki U-14 ki long ki nongjop ha ka semifinal.
