Shillong, Nohprah 03 : Ka Khasi Students’ Union (KSU) kala kdawa ia ka Sorkar Pdeng ban leh eiei halor ka jinglong jingman hapoh ka North Eastern Institute of Ayurveda Homeopathy (NEIAH) da kaba rai ban thungnoh mardor ia u/ka Director thymmai ba pura.
Ha ka shithi sha u Secretary ka Ministry of Ayush, ka KSU-NEIAH Unit kala ong ba ka NIAH kala pyniaid ia artylli ki college, kumta, ka jingbym don ia u/ka Director ba pura ha kane ka jaka pule kala ktah ia ka jingiaid beit iaid ryntih jong ka.
Ka Seng kala ban jur ruh halor ka jingdonkam ban thung ia ki Nonghikai ba pura hapoh kane ka jaka pule. Kala ong ba ka jingthung ia ki nonghikai ba shu khot sngewbha, kam shym la iarap satia ban pynsting ia ka jingsngewkhia bad kala nang pynkulmar jingmut pynban haba iadei bad ki jingdonkam ha ka jingpule, ka jingioh ia ki nongtbin lynti bad nongiarap lem bad kiwei kiwei.
Kala pynkynmaw ba ka jingbym lah ban thung ia ki nonghikai ba pura ka long kaba iaid pyrshah ia ki kyndon ka National Commission fo Homoeopathy (NCH) bad National Commission for Indian System of Medicine (NCISM) halor ka Minimum Standard Requirement jong ki Medical College (Homoeopathy and Ayurveda).
Ka KSU kala dawa ruh ban thung noh ia u/ka Principal ba pura ha ka College Homoepathy, ai jingsiew ia ka jingleh internship shabar, kaba dei ka prokram jong ka BHMS naduh 3 bnai haduh 6 bnai bad ban pynrung klas biang ia ki second batch PGT 2024-2025.
