Shillong, Nohprah 01 : Ka kynhun tem ba pawnam ka Sweden-ka “Europe” kala pyng lyng-uh pum ia ka Me’gong Festival ha madan ha Baljek, West Garo Hills, kaban pynsah jingkynmaw shirta ia ki palat 90,000 ngut ki paidbah.
Kane ka kynhun kaba pawnam na ki jingrwai kum ka “The Final Countdown”, “Carrie” bad kiwei kiwei, kala wan tem biang sha India hadien 36 snem, bad ka sien ba ka wan tem khatduh ka dei ha Mumbai ha u snem 1988.
Kaei kaba pynlong ia kane ka tamasa kaba kham kyrpang shuh shuh ka dei ka jingwan tem ruh jong ka kynhun rwai rock ba pawnam ka Ri India-ka Indus Creed, kaba la kiew lang ha kajuh ka rynsan bad ka Europe. Ka Indus Creed kala plie ia ka rynsan na ka bynta ka
Europe ha Mumbai ha u snem 1988, ha ka por ba dang tip ia ka kum ka “Rock Machine”.
Ka Me’gong Festival kala khring ia ki riew ieid jingrwai na kylleng ka Ri India bad na kiwei ki Ri ruh kumjuh, ia kaba bun ki ngeit ba kan dei ka sien wan ba khatduh jong ka Europe sha Ri India.
Ha ka social media page ‘Facebook’- ka Europe kala pynpaw ba kan kynmaw ia kane ka miet ha Me’gong Festival bad ong “Ngim lah ban ap ha kaban wan phai biang bad ban iohi biang ia phi”.
U Myntri Rangbah ka Jylla Conrad K Sangma, u Myntri kam Jngohkai Bah Paul Lyngdoh, u Myntri ka tnad PHE Marcuise Marak, u Chief Secretary ka Jylla Bah DP Wahlang bad u Commissioner ka Tourism Dr Vijay Kumar, laiohi ba kila shongshit bha bad kyr-iuh naphang ha ryngkat ki jingrwai jong ka Europe.
U Myntri Rangbah ula pdiang dalade ia ka kynhun Europe bad kiwei ki kynhun tem kiba wan sha Meghalaya bad sha Ri-lum Garo. Ula pynpaw ba ki paidbah ka Jylla bad ka North East baroh kawei, kila heh la san haba sngap ia ki jingrwai jong ka Europe bad ka dei ka jingphohsniew kaba la urlong shisha ia kiba bun ban iohi Live ia kane ka kynhun tem.
Ula pynpaw ruh ba ka thain ka dei kaba ieid bha ia ki jingrwai rock jong ki snem 80 bad 90 bad ka Me’gong Festival kala khring ia kiba bun ki riew ieid jingrwai na kylleng ka Ri.
“Ngim la ap ban kiew rynsan ha ka Me’gong Festival ha Ri-lum Garo. Ka long kaba sngewkmen ba ki jingrwai jong ngi kila poi shaduh sha kane ka jaka ba kyndong jong ka pyrthei” ong u Joey Tempest, u Nongrwai kaEurope.
“Nga kynmaw ia ki briew ba ieid ia ki jingrwai jong ngi ha u snem 1988 bad ngi kmen ban iohi ia kajuh ka jingieid hangne. Kane ka jingwan jong ngi sha Ri-lum Garo khlem pep kan nang ai mynsiem ban thoh ia ki jingrwai jong ngi”.
U Joey Tempest ula iaroh ia ka jinglong ka sawdong sawkun ka Ri-lum Garo bad ong “Ka Kynhun ka dang dei kawei na kiba tbit ha kane ka pyrthei bad ka jingktah jong ki jingrwai jong ngi ka dang khraw bh” ula ong bad bynrap “Ka put ka tem kan ym iap ! ka jingrwai rock kan iai im beit”.
