Shillong, Naiwieng 27: U Myntri ka tnat Pule Puthi Rakkam A Sangma hynne ka sngi Balang, u la plie paidbah ia ka 2nd Tura Me’gong International Literary Festival.
Ha kane ka sngi la iadonlang u MLA ka Rangsakhona constituency u Subir Marak, u Chairman ka MCCL u Dabo M Marak, u Executive Chairman MBOSE Tura u CP Marak lem bad kiwei ki riew pawkhmat, ki dkhot ka A’chik Literature Society, ki nong shah khot sngewbha na ka Ri Bangladesh, naka Jylla Tripura, Karbi Anglong, Assam, ki samla pule jong ka NEHU, Tura Campus ha DC Park, Tura.
Ka thong jong kane ka Literary Fest ka long ban pynpaw pyrthei ïa ka Ktien, ka Thoh ka Tar bad ka Kolshor jong ki jaidbynriew Garo.
Ia kane ka prokram la pynlong da ka Department of Garo ka skulbah NEHU, Tura Campus ha ryngkat ka jingiatreilang bad ka A’chik Literature Society bad ka Don Bosco College, Tura.
Haba pynpaw ïa ka jingsngewnguh ïa ki nongpynïaid bad ki nongnoh synñiang na ka bynta kane ka Literary Festival, u Myntri ka Pule Puthi ka Sorkar Jylla u Rakkam A Sangma u la ong ba ka jingpynneh pynsah ïa ka ktien ka thylliej bad ka thoh ka tar jong ki Garo ka long kaba donkam na ka bynta ki pateng ban wan.
“Ka jingthmu jong ka pateng kaba mynta kam dei ban bam ia ki marpoh khyndew jong kane ka juk hynrei ka dei ban pynneh pynsah na ka bynta ki pateng ban wan. Kadei ka jingkitkhlieh jong uwei pa uwei uwei na ngi ban noh synniang bad ban sam ia ka jingstad bad jingstad na ka bynta ka jingmyntoi ki pateng ban wan” la ong u Rakkam.
U Rakkam u la kyntu ruh ïa ki dkhot jong ka Literature Society ba kin pynshlur khamtam ïa ki samla ba kin nang bad khien kordor ïa ka ktien, ka thoh ka tar bad ka kolshor Garo.
U la ong ba ka jingthoh ka long ka lad lyngba kaba ka juk mynta ka lah ban ai iaka pateng ka ban wan daka ba pynneh pynsah iaka ktien, ka thoh ka tar bad ka kolshor Garo.
Haba pynpaw ïa ka jingsngewnguh ïa ka riti dustur ba riewspah jong ki jaidbynriew Garo, u Myntri u la ong “Ki ktien jong ki riewlum ruh ki donkam ban pynneh pynsah namar ba ki la jan duh jait noh”.
Haba pynksan ia ka jingdonkam jong ka jingpule kot, u la ong ba haba u briew u pule kot, u pynlut pisa bad da kata u ioh ia ka jingtip bad jingsngewthuh kaba kham bun bad u lah ban long u briew uba kham bha ha ki por ban wan.
Hashuwa kane u Kongsan ha ryngkat kiwei pat ki riew pawkhmat ki la pyllait paidbah ia ki kot kiba iadei bad ka Indo-Bangla Cultural Youth Camp Documentation da u Associate Professor, Don Bosco College, Tura Barbara S Sangma bad ka Kot Poetry kaba la ai kyrteng Gisikni Kubirong Bak II da Associate Professor, Tura Government College, Rhinkle M Marak.
Ha ka sngi kaba ar jong kane ka tamasa kan pynpaw pyrthei ïa ki jingïakren bad ki nongthoh kot Garo, ki jingïakren ba kyrpang halor ki jingnoh synñiang jong ka thoh ka tar (poetry) bad ki mat ba ïadei bad ka mariang ha ryngkat bad u Apurbo M Marak, Regional Director, Caritas Mymensingh Region, Bangladesh, Rev. Dr. Wetterfield R Marak, Retd. Pastor, Tura Baptist Church, Rev. Fr (Dr.) Jogesh B Sangma, Principal, Don Bosco Junior college, Tura.
