Shillong, Naiwieng 27 : U Lamphang ka Iingdorbar Thaw Ain Thomas A Sangma ha ka sngi Balang, ula ong ba karai jong u halor ka jingpyniasoh ki lai ngut ki MLA ka Congress ha ka National People’s Party (NPP) ka dang ieng beit hynrei kino kino kiba pyrshah, ki lah ban mudui pyrshah ia kane ka rai.
Haba kren sha ki lad pathai khubor halor kane ka kam, u Thomas ula ong “Ngi don ha ka riti synshar paidbah, baroh ki don ia ka hok ban mudui. Nga la dep ai ia ka rai jong nga bad kane ka rai ka dang ieng hynrei nga pdiang sngewbha iano iano ruh kiba kwah ban mudui pyrshah ia ka rai”.
“Hooid, man ka por ka ju mih ka jingmudui pyrshah, ngi hap ban bishar ia kaei kaba don ha ka mudui. Ngi phah ia ka sha ki stad ain, ngi shim ia ki jingai jingmut jong ngi bad ngi sa ai pat ia ka jubab jong ngi” ula ong.
U President ka Meghalaya Pradesh Congress Committee Bah Vincent H Pala ha ka 3 tarik Naiwieng, ula pynpaw ia ka jingbym sngewtynnad halor ka jingkynnoh pynslem jong u Lamphang ban ai ia ka rai halor ka jingujor ba dawa ban mait kyrteng ia ka jinglong MLA ki laingut ki MLA ka party kiba leit pyniasoh sha ka NPP.
Ula pyntip ruh ba ka Congress kala pynkhreh ba shen kan sa leit buh ia ka mudui hakhmat ka Iingkashari Meghalaya High Court ba kan tuklar lem halor kane ka kam.
Ka congress kala ujor ia artylli ki mudui-kawei ka long pyrshah ia arngut ki MLA-Charles Marngar (Mawhati) bad Ganbriel Wahlang ( Nongstoin) katba kawei pat ka long pyrshah ia u Dr Celestine Lyngdoh (Umsning)-hadien ba ki leit iasoh sha ka NPP ha ka 19 tarik Nailar.
