Nongpoh, Naiwieng 27 : Ka Khasi Students’ Union (KSU)-North Khasi Hills Eastern Border Area, kala dawa ia ka Tnad ka Koit ka Khiah ba kan pynlong ia ka jingtohkit halor ka jingkynnoh ba khlad I Khunlung kynthei ba dang 2 snem ka rta hadien ba ai injek ha Bhoirymbong Community Health Centre (CHC).
Kane ka seng hapoh ka jingialam u President samla Banjop Maring, hynne ka sngi Balang, kala leit ban buh da ka jingujor hakhmat ka District Medical & Health Officer (DM&HO) ka Ri-Bhoi, ba dawa tohkit bad pynshai halor katei ka jingjia.
La kynnoh ba kane ka jingkhlad ine i Khunlung kala jia ha ka 21 tarik Naiwieng hadien bala pynkit ia i sha Nazareth Hospital, Shillong. La kynnoh ba ine i Khunlung ila kem pang bad shitom jur tang hadien ba ai injek ha Bhoirymbong CHC, kaba la jia ha ka 15 tarik Naiwieng, 2024.
Ka KSU hadien ka jingiakren bad ki bahaiing hasem, hynne ka sngi kala leit iakynduh ia ka DMHO ka Ri-Bhoi ban dawa tohkit bad ai jingshai kaba bniah ia kaei kaba jia.
U samla Banjop Maring ula dawa ba ka Tnad ka Koit ka Khiah lyngba ka Ophis ka DM&HO, ka dei ban pynlong ia ka jingtohkit halor kane ka jingjia ban lap la ka jingiap jong ine I Khunlung ka dei namar ka jingbakla ai injek ne dei namar kiwei kiwei ki jingshitom.
Ula ong ba lada mih kum kine ki jingjia, kan pynsyier shibun ia ki paidbah ban shaniah ha ki jaka sumar jong ka Sorkar. U ong ba ki borkhmih ka Bhoirymbong CHC ki dei ban ai jingpynshai kaba thikna ban wanrah ia ka jingsngew shngain hapdeng ki paidbah ba leit ban shah sumar ha kane ka jaka sumar ka Sorkar.
Une u Nongialam ka KSU ula pyntip ba ka DM&HO kala mynjur ban buddien bad ban tohkit thikna ia kane ka jingjia bad ia ka jingpynshai yn sa pynbna hadien bala ioh ia ka kaiphod jong ka jingtohkit.
 ka Ri-Bhoi, ba dawa tohkit bad pynshai halor katei ka jingjia.){kind=link}