Imphal, Naiwieng 17 : Ka jinglap ia ki hynriew tylli ki metiap jong ki kynthei bad ki khynnah ha Jiribam District ka Manipur, kala aiding biang ia ka kam iaumsnam hapoh ka Jylla bad ki paidbah kila hiar thma ia ki Iingsah jong ki katto katne ki Myntri Sorkar bad ki MLA, kiba dei na ka BJP kaba Synshar ia ka Jylla.
Kat kum ka khubor Pulit, ki paidbhur kila hiar thma ha ka sngi Saitjain ia ka Iingsah u Myntri kam Pohiing Sapan Ranjan Singh,u Leishangthem Susindra Meitei bad u Yumnam Khemchand Singh kiba don ha ki jaka bapher bapher. Napdeng ki MLA kiba shah thombor ki dei u Rajkumar Imo Singh, uba dei u pyrsa kurim u Myntri Rangbah N Biren Singh.
Ki nongiakhih kila leit ialum paidbah ruh hakhmat ka iingsah u MLA ka Janata Dal (United) T Arun jong ka Wangkhei constituency bad u MLA ka BJP na Langthabal u Karam Shyam, katba kawei ka kali kaba pynieng habar iing u MLA ha Imphal kala shah wiang ding.
Kane ka jingkulmar kala khia ha kylleng ki jaka ka Imphal East bad Imphal West District ha kaba ki kynhun nongiakhih kila leit iatur sha ki Iing jong ki nongialam seng sain pyrthei bapher bapher. Ki bor pahara kila hap ban siat da ki suloi tyndong lyer pynsah khmat ban pynsaphriang ia ki paidbhur ha sor Imphal bad ha khapsor.
Kane ka jinghiar thma, ka jingpakhang surok bad ki jingialum paidbah kila mih hadien ka jinglap ia ki metiap ha Jiribam, kaba la nang aiding shuh shuh ia ka jinglong jingman bad jingiaumsnam hapoh ka Jylla.
