Nongpoh, Naiwieng 11 : Ki artylli ki Shnong ka thain Bhoirymbong, kila kyntu ia ka Tnad Forest ba kan pynlong ia ka jingtohkit bad thwet ia ki briew kiba donkti ha ka jingpom pathar ia ki dieng hapoh ka khlaw Raid Bhoirymbong Pyllun.
Kine ki ar-shnong ki dei ka shnong Lumdaitkhlaw bad ka Lumsohpieng, kiba la hiar jurip ia kane ka khlaw lem bad ki riew rangbah na kine ki shnong ha ryngkat ki bor khmih ka Riat Khwai Forest Beat House.
Ia kane ka jingjurip la ialam da u Bah Aibor Jyrwa na Lumsohpieng bad Tyngshain Makri na Lumdaitkhlaw ha ryngkat bad u Bah S Pyngrope jong ka Tnad Forest.
Ha ka jingjurip, la lap ba ki briew ki bym lah ban tip ki dei kiei, kila pom pathar ia ki dieng kiba la san ba da ki phew tynrai ha kane ka khlaw.
Halor kane ka jingshem, ka Tnad Forest kala shimti noh ia kitei ki dieng kat kum ki kyndon ain.
U Bah Aibor Jyrwa kum u riew rangbah ka thain, ula pynpaw ia ka jingsngewkhia kaba khraw halor ka jingshim kabu ban pom bad pynkhyllem pathar ia ki phew tynrai ki dieng ha kane ka khlaw. Ula ong ba kane kala pynkthang mynsiem ban iohi ia kane ka kam bymman.
Kine ki ar-shnong kila pynpaw ruh ia ka jingsngewnguh ia ki Ophisar ka Tnad Forest kiba la kloi ban wan jurip ia kane ka khlaw haba kyntu ruh ia ka Tnad ba kan tohkit bad ban thwet ia ki briew kiba donkti ha kane ka jingpynjot ia ka mei mariang.
