Shillong, Naiwieng 08: Ka Rangdajied United FC kala ioh ia ka jingjop kaba ka donkam bha da kaba pynrem da 1-0 ia ka Nongrim Hills ha ka jingiakhun ia ka OC Blue Shillong Premier League 2024.
U Dibormi Kassar ula ioh thep ia katei ka kol ha ka minit kaba 87 na ka bynta ka Rangdajied kaba la pynthikna syndon ban khur ia ka jingjop.
Kane ka jingjop kala pynlong syndon ia ka Rangdajied kaba don ha ka kyrdan kaba 7 ban poi noh sha ka kyrdan kaba 4, katba ka Nongrim Hills kaba don ha ka kyrdan kaba 6 kala hiar noh sha ka kyrdan kaba 7.
Ka jingiakhun ha ka kylla step kam shym la long kaba itynnad ba baroh ar tylli ki kynhun bad kim shym la lah ban thaw pyrthei eiei ban ioh thep kol khamtam eh ka Rangdajied kaba la ioh ia ki katto katne tylli ki kabu. U Nongapkol ka Rangdajied u Banshanskhem Kharsyntiew ula ialehkai bha bad ula ioh ban iada arsien ia ka bol ban rung shapoh kol.
Ha ka kylla miet, ka Rangdajied kala ioh bun ki kabu hynrei kam shym la lah ban thep kol hynrei hashwa ba kan kut noh ka jingiakhun u Dibormi khlem kano kano ka jingbakla ula thep ia ka kol.
Ha ka sngi saitjain kin don ar tylli ki jingiakhun ha ka SPL, ka Nangkiew Irat SC kan iakhun pyrshah ia ka Mawlai SC ha ka por 1 baje mynsngi bad ha ka por 4:30 janmiet ka Shillong Lajong FC kan iakhun pyrshah ia ka Ryntih FC.
