Shillong, Naiwieng 07: Kala long ka sngi jong ki nongkawang bol kaba la pynlong ia ki 16 ngut ki nongtied ba kin khyllem ne ‘Out’ ha ka sngi sdang nyngkong jong ka jingiakhun ia ka Ranji Trophy 2024-25 Elite Group A hapdeng ka Meghalaya bad ka Jammu & Kashmir ha MCA Ground, Polo, ha kaba ka Jammu & Kashmir kala tam da 52 run.
Haduh ba kut ka jingialehkai, ka J&K kala kamai 125 run bad hap 6 wiket, hadien ba kala pynkhyllem lut ia ki nongtied ka Meghalaya kaba la kamai tang 73 run.
Ka J&K kala jop ia ka jingkynting pisa bad kala jied ban leit kawang bol nyngkong da kaba peit ia ka jinglong jingman, hynrei haba ki nongtied ka Meghalaya kila mih ha madan kila lah ban ialehkai bha ha ki 1 kynta pyrshah ia ki nongkawang bol ka J&K.
U Bamanbha Shangpliang bad u Arpit Bhatewara kila kamai 53 run ha kaba u Bamanbha ula out noh bad kamai 21 run bad u Arpit ruh ula out noh bad kamai 24 run, hynrei hadien katei ka kynhun jong ka Meghalaya kala shu khyllem jrain jrain ha ki ar ngut ki nongkawang bol ka J&K bad kamai tang 73 run.
U Abid ula ioh khur 5 wiket bad ai tang 19 run katba u Auqib Nabi ula ioh khur 5 wiket bad ai tang 9 run.
Ka jinglong jingman jong ka madan ialehkai kaba ailad bha ia ki nongkawang bol kala iai bteng ha kaba ki nongkawang bol ka Meghalaya ruh kila ioh ban shim 6 wiket ha kaba u Akash Kumar Choudhary ula ioh shim 3 wiket bad ai 39 run.
U Ram Gurung, u Dippu Sangma bad u Aryan Borah kila ioh mar 1 wiket.
Wat hapdeng jong katei ka jinglong jingman ka J&K kala lah ban kyrda bad ban beh ia ka run kaba rit kaba la buh da ka Meghalaya.
U Abdul Samad ula kamai 34 run na ki 34 bol hynrei ula shah pynkhyllem noh ha u Dippu.
Ka J&K kan bteng ban leit tied biang lashai ka sngi bad kan ialeh ban kamai shuh shuh katba ki nongkawang bol ka Meghalaya kin pyrshang katba lah ban pynhap kloi ia ki nongtied jong ka J&K.
