Shillong, Naiwieng 05 : Ka MP barim ka Tura Agatha K Sangma ha ka sngi Ba-ar, kala shimti kum ka Chairperson ba thymmai jong ka State Commission for Protection of Child Rights (SCPCR) bad smai ban trei shitom na ka bynta ka jingshngain bad jingiada ia ki Khynnah hapoh ka Jylla.
Ka Agatha kala leit ruh ban iakynduh ia u Myntri ba khmih ia ka Tnad Social Welfare Bah Paul Lyngdoh hadien ba ka shimti ia ka shuki.
Haba iakren bad ki nongthoh khubor, ka MP barim kala ong “Hooid ka jingthungkam kala dep naduh kine ki khyndiat bnai bala leit hynrei namar ban gam da shait bha kumta, mynta ka sngi nga la wan shimti ia ka kam bad nga sngew kmen bha namar nga tip ba ki don shibun kiei kiei kiba hap ban leh”.
“Hynne ka sngi nga la leit sha Ophis bad iakynduh ia ka Chairperson barim bad ka kynhun treikam bad kila don shibun ki kam kiba la dep leh da ka Commission bad ka dei kaba hap ban iarap. Nga shu kyrmen ba nga ruh ngan lah ban trei bha bad leh eiei nang pynkhlain ia ka jingshakri jong ka Commission” kala ong.
Halor ka jingsakhi ka Jylla ia ka jingkiew ki kam bymman pyrshah ia ki khynnah, kane ka Chairperson ba thymmai kala ban jur ia ka jingdonkam bad iatreilang bad ki Shnong ki Thaw khnang ban pynioh ia ka jaka ba shngain ia ki khynnah ba kin im.
Haba pynpaw ia ka jingsngewkhia halor ka jingslem ban bishar ia ki case POCSO, ka Agatha kala ong “Ngi hap ban leh eiei halor kane bad kane kam dei satia kaba jia tang ha Meghalaya hynrei hapoh ka Ri baroh kawei, ki case POCSO kim dei kiba iaid sted ha ka jingbishar”.
“Ki don ki Iingkashari fast track hynrei phi iohi namar ba ka don ka kuna rai pyniap, kumta kala shimtia ban pynbna ia ki jingpynsajia. Kane kam dei kaei kaei kaba mad tang ka Meghalaya hynrei kala jia ha baroh kawei ka Ri bad kumta, ngi hap ban trei ha ryngkat bad u Myntri bad kumta nga la wan ban iakren bad u mynta ka sngi ban shim ia ki lynti jam ba shakhmat” kala bynrap.
Haba kyntait ban kynthoh ia ka jingkynnoh thung bahaiing ha lyndet ka jingthungkam ia ka, kane ka MP barim kala ong “Ngam don eiei ban kynthoh ia kane namar kano kano kaba phi leh kan don beit ka jingkynthoh. Shisha hok, nga wan hangne ban pyni ia ka kam jong nga bad kyrmen skhem ba ha ki por ban wan, ki kam jong nga kin sa kren dalade”.
 bad smai ban trei shitom na ka bynta ka jingshngain bad jingiada ia ki Khynnah hapoh ka Jylla.){kind=link}