Shillong, Naiwieng 4: Ka Nongthymmai SC kala jop ha ka jingiakhun ha ka OC Blue Shillong Premier League 2024 da kaba pynrem ia ka Laitkor SC da 3-1 hynne ka sngi Nyngkong ha SSA Stadium, First Ground, Polo.
U Ronald Singh Shaikhom ula thep ia ka kol ha ka minit kaba 4 lyngba ka penalty bad u Michaelson Kurbah ula thep 2 kol ha ka 36 bad 54 minit naka bynta ka Nongthymmai, katba u Fridison Wanniang ula thep ia ka kol ha ka 38 minit na ka bynta ka Laitkor.
Ka Nongthymmai kala jop ha ka sien kaba nyngkong ha ka taiew kaba la dep pyrshah ia ka Nongrim Hills bad hynne ka sngi kala bteng biang ban rah ia ka jingjop da kaba pynrem ia ka Laitkor, hynrei ka Laitkor kadei ka kynhun kaba la jop arsien lynter ha ka jingiakhun hynrei kala mad iaka jingrem pat hynne ka sngi.
Mar ia sdang ia ka jingiakhun ka Nongthymmai kala ioh ia ka penalty bad haba u Ronald Singh Shaikhom ula thep ia ka kol bad kane kala ai mynsiem iaka Nongthymmai ban ialehkai bha.
Ha ka minit kaba 22 ka Laitkor kala ioh ia ka lad ban pyniakhiad hynrei ka bol kaba lashut jam bha kala leit dei ia udieng kol bad kala mih noh shabar, hadien katei ka Nongthymmai kala ioh ia ka kabu lyngba u Michaelson uba la shut ia ka bol hynrei u rang ap kol ka Laitkor ula ioh ban iada ia katei ka bol ban rung shapoh kol.
Hashwa ban kut ka kylla step, u Michaelson Kurbah ula thep ia ka kol ha ka 36 minit naka bynta ka Nongthymmai hynrei tang hadien 2 minit jong katei u Fridison Wanniang ula ioh thep ia ka kol na ka bynta ka Laitkor bad ka jingiakhun ha ka kylla step kala kut ha ka 2-1.
Mar ia sdang ka jingiakhun ha ka kylla miet, tang hadien 10 minit u Michaelson ula ioh ban thep ia ka kol kaba lain aka bynta ka Nongthymmai bad kane kala pynskhem ia kaNongthymmai ban ioh khur biang ia ka jingjop.
Katei ka kol kadei ruh ka kol kaba 50 kaba la ioh ban thep ha kane ka OC Blue SPL 2024 bad u Michaelson mynta ula ioh thep 4 kol bad ula kylla long u nongialehkai uba wan baar haka jingioh thep bun kol ban iaknieh ia ka nam Top Scorer.
Ka Laitkor hapdeng ka jingioh iaka jingkyrshan na ki nongpeitkai kala bteng ban ialehkai bha bad kala ioh ia ka kabu kaba biang bha haka minit kaba 82 hynrei na ka jingtbit u nongap kol ka Nongthymmai u Roni Das ula ioh ban iada ia ka bol ban rung shapoh kol.
Ha ka jingialehkai kaban wan kan long hapdeng ka Shillong Lajong FC pyrshah ia ka Mawlai SC kaba dang bat ia ka nam Champion.
