Shillong, Naiwieng 03 : Ki 21 tylli ki Shnong ka West Khasi Hills na ka thain Mawshynrut, kila rai ban leit tur paidbah sha KHADC bad pynlong ia ka jingiakhih da kaba iashong kyllain myngor ha phyllaw ka Council naduh ka 9 tarii Naiwieng.
Kine ki 21 tylli ki Shnong ki dei kiba hap hapoh ki lai tylli ki Polling Station-ka Misei, Langdongdai bad Mawsmai, kiba pyr shah jur ia ka jingpynkynriah ka KHADC ia ki na Mawshynrut constituency sha Rambrai-Jyrngam constituency ha ka jing pynbeit thymmai ia ki constituency dang shen.
Kine ki 21 tylli ki Shnong kiba la thaw da ka Joint Action Committee (JAC), kila shim ia kane ka rai ha ka jingialang paidbah kaba long ha ka sngi Saitjain ha Mawsmai.
Namar ka jingiai sngap mynthi jong ka KHADC ia ki jingdawa ban pynphai biang ia baroh ki shnong sha ka Mawshynrut constituency, ka JAC ha ryngkat ki paidbah Nongshongshnong kala pynbna syndon ban leit tur paidbah bad ban iashong kyllain mungor ha KHADC ha ryngkat ki placard ha kti.
Haba kren ha ka jingialang, u Chairman ka JAC Bah Jeremiia Dkhar ula ong ba ki paidbah ka Nongtrai Sepngi kin leit ban ia shong dihsha bad bamja ha ryngkat u Chief Executive Member (CEM)Bah Pyniaid Sing Syiem bad Deputy CEM Bah Pynshngain N Syiem, ban pynbor ha kaban pynphai biang noh ia ki 21 shnong sha ka Mawshynrut Constituency.
Ka JAC kala pynpaw ruh ba lada jia eiei kaba sngewsih ia ki paidbah ki 21 shnong ha ka jingleit shong kyllain mungor, u CEM bad u DyCEM ka KHADC ki dei ban shim ia ka jingkitkhlieh.
