Guwahati, Naiwieng 01: U Nongialam jongka Vishwa Hindu Parishad (VHP) u Surendra Kumar Jain ula pynmih ia ka jingiakynad da kaba kynnoh ba ki Balang ki dei ki jaka khaïï drok, bad pynbitar lep ia ki riewngeit Khristan kiba don ha kylleng jong ka jylla Assam.
Haba kren ha ka jingplie ia ka Joya Thaosen Computer Learning Centre ha Haflong’s Dima Hasao District ha ka 27 tarik u Risaw, u Jain uba long u International Joint General Secretary ka VHP, ula ong, ba ki Balang ki donkti bad ki kam khaïï droks bad pynksan ba kine ki kam jong ki Balang kila pynhiar dor ia ki samla.
Katei ka jingkren kala pynlong ia ki riewngeit Khristan ban pynrem jur ia u Surendra Kumar Jain da kaba ong ba ka jingkren ka jongu ka long kaba bym don nongrim bad kadei tang ka jingpynthohbria.
Ka United Christian Forum of Dima Hasao (UCFDH) kala ai ia ka kyrwoh kaba tyngeh pyrshah ia ka jingkren u Jain bad ong ba ka dei ka jingpyndonkam bakla ia ka hok ban pynsngew bad ka jingpynmong iaka jingsngew niam ha ka thaiñ.
U President ka UCFDH u DC Haja Daniel bad u Secretary u Winssonal Massa kila pynpaw ia ka jingdiaw bad jingbynniaw ba katei ka jingkynnoh pyrshah ïa ki Balang ki long kiba pynmong bad ki bym don nongrim. Kila pynpaw ia ka jingkular jong ka Balang ban pynroi ia ka imlang sahlang kaba lait na ki droks, da kaba pynksan ia ki jinghikai kaba ki ai shaphang ka jinglong khuid, ka jingpyniaid ialade bad ka jingdonkam ban kiar na ki jingdih kiba sniew bad kiba ma.
Ka Balang, kala pynskhem ba kam kyrshan ne ïashimbynta ha ki kam kiba ïadei bad u drok, hynrei ka hikai ïa ki dkhot shaphang ki jingma jong ka jingkyrno ha ki jingdih pynbuaid.
Ka UCFDH kala pynpaw ba ki jingkynthoh u Jain ka long kum ka “jingkren beiñ bad kiban pyniashun,” bad kila wer ïa ki nongshong shnong jong ka Dima Hasao ban ïeng tylli kawei ban pyrshah ïa ka jingdih drok, ban kiar na ki jingngew ïapher niam bad ban tei ïa ka imlang sahlang kaba koit ba khiah. Kila pynksan ruh ba ka Balang kala ju shimkhia ban iada ia ki riewshimet bad ia ka imlang sahlang na ka jingshah ktah ha ki jingdih pynbuaid.
Katba u MLA barim u Samarjit Haflongbar ula ong, “Ngi lah khmih bniah ia ka jingkren u Jain. Lada ka long kaba shisha, ki bor aiñ kidei ban shimkhia noh mardor, hynrei lada kam dei kaba shisha dei ban pynrem jur ia katei ka jingkren”.
U Haflongbar ula ban jur ba ym don kano kano ka jaka mane, la ka long ka temple, ka mosque, ne ka iingmane kaban pynshlur ia ka jingpyndonkam ia u droks bad ula kyntu ban long kiba phikir bad kiba tehlakam haba ai jingkren paidbah khnang ban lait na ka jingpynmih ia ka jingpynthud ia ka jingiatylli ha ka imlang sahlang.
 u Surendra Kumar Jain ula pynmih ia ka jingiakynad da kaba kynnoh ba ki Balang ki dei ki jaka khaïï drok, bad pynbitar lep ia ki riewngeit Khristan kiba don ha kylleng jong ka jylla Assam.){kind=link}