Shillong, Risaw 31: Ka Khasi Students’ Union (KSU) kala phah da ka dorkhas sha u Symbud Myntri Rangbah ka jylla Bah Prestone Tynsong, ba ujor pyrshah ia ka jingbym beit ka rukom thungkam hapoh ka tnad Directorate of Prosecution ba la pynlong da ka Meghalaya Public Service Commission (MPSC).
Ka kyrwoh na ka KSU lyngba ka Employment Monitoring Cell, ka kynthoh ba ka Seng bad ki paidbah kim sngew pher shuh ia ka jingtorti ka rukom thungkam thungjam lyngba ka MPSC bad kane kan dang iai jia katba pat pynkylla ia ka rukom treikam jong ka MPSC.
“Ka MPSC kala khot thep kam (Application) na bynta 6 tylli ki Post jong Asst.Public Prosecutor ha u snem 2023 bad katkum ka jingpynbna laitkam (Advertisement), mano mano kiba kwah ban applai na bynta kitei ki Post, ki hap ban dei kiba la trei teng (Experience) ym duna 3 snem kaba mut ba ki dei ban dei ki Muktiar kiba la iasaid mukotduma ha iing bishar ym duna ia ka 3 snem bad ki dei ruh ban long kiba la pyndep ia ki Criminal Cases” ong ka kyrwoh na ka KSU.
Ka KSU kala kam ba uwei napdeng kine kiba pass bad mih kyrteng ba thep kam Asst. Public Prosecutor, um shim la lah ban pynbiang ia kitei ki kyndon kiba la paw ha ka Advertisement.
“Ka Seng ka la lap ruh ba u dang shu pass ia ka eksamin ha u snem 2023 bad lehse un pat lah ban pyndep ruh ia ka eksamin All India Bar Examination (AIBE), kawei na ki eksamin ba ki Muktiar (Lawyer) ki hap ban pass hadien ba la ioh Law Degree ban lah ban ioh Licence ban ia said kum u Muktiar ha iingkashari” kala ong.
Ka seng kala kynthoh ba kane ka jingshah jied jong une u kyrtong (candidate) ka pyni ba ka don eiei sha lyndet ba ka MPSC ka pynkheiñ hi ia ka kyndon ba ka lah buh.
“Haba ka MPSC kam pyntreikam ia ki kyndon te ka myntoi aiu ban buh bad ha kajuh ka por ka jingdon jong kine ki kyndon ka pynlong ia kiwei ba dang shu pass ba nym ioh applai” la buh jingkylli ka KSU.
Haba iadei bad kane, ka KSU ka dawa ba ka tnat kam pohiing (Police) ka dei ban pynbeit ia kine ki kynrum kynram bad jied ia ki briew kiba dei hok ban ioh.
