Shillong, Risaw 29 : U Chief Executive Member (CEM) ka Jaintia Hills Autonomous District Council (JHADC) Bah Thombor Shiwat, ha ka sngi Ba-ar, ula plie paidbah ia ka Jaintia Durbar Hall ka ban don lang ka Ophis treikam jong ki Dolloi ka Ri-lum Jaintia haba ki wan donkam sha Jowai.
Kane ka Durbar Hall ka dei kaba don ha Loomsooiung, Jowai bad la tei ia kane hapoh ka 13th Finance.
La plie ia kane ka Durbar Hall ha ka jingiadonlang u DyCEM Bah Lasky Rymbai, u EM ka tnad Civil Works Bah Phasmon Dkhar, ki MDC bad ki Nongtrei jong ka Council.
U Bah Phasmon Dkhar ula pyntip ba kala shimpor bha ban tei ia kane ka jingtei hynrei kane ka Excutive Committee ba mynta kala shimkhia bha ia kane ka kam khnang ban lah plie noh ia ka kham kloi kat kaba lah.
U Bah Thombor Shiwat ula kyntu ia ki paidbah ba kin nym bret jakhlia pathar ha kane ka Building bad ban pyndonkam ia ka na ka bynta ka bha ka miat ba hadien habud.
Ula ai khublei ia ka Tnad Civil Works hapoh ka jingialam u Executive Committee namar ka jinglah pynthikna ba ka jingtei ia kane ka building kan dep kloi.
U Bah Thombor ula pyntip ruh ba ka Council kala ioh pdiang ia ka song pisa na ka bynta ban tei ia ka Iawmusiang Shopping Complex bala shu sahtang la slem bad shen kane ka jingpyntrei ia kane ka jingtei kan sa sdang biang.
“Ka Sorkar Jylla kala pyllait ia ka song pisa ba T.26 klur ban tei ia ka Iawmusiang Shopping Complex. Kane kala urlong namar ka jingtrei shitom jong kane ka Executive Committee ba mynta, kaba la iakynduh ia ka Sorkar na ka por sha ka por halor kane ka kam” ong u Bah Thombor.
Ka Iawmusiang ka dei kawei na ki Iew tynrai bah eh bad ka rim tam ha ka thain bad kala don naduh ki por jong u Syiem Jaintia. Ka jingtyrwa ban shna bha ia kane ka iew kala ioh ia ka jingmynjur jong ka Sorkar ha u Naitung 2006.
Ka Ministry of Development of North Eastern Region (DONER) kala mang ia ka song pisa ba T.20.09 klur na ka bynta kane ka iew bad kala dep pyllait ia ka instalment ba nyngkong kaba kot T.6.33 klur ha ka 10 tarik Rymphang, 2009.
Ha ka 4 tarik Rymphang, 2020, u Myntri Rangbah ka Jylla Conrad K Sangma ula leit ban jurip ia kane ka Shopping Complex bala shu ieh khlem dep bad pynbna ia ka rai jong ka Sorkar ban mang pisa ha kaban pynsdang biang ia ka jingtei katba dang ap ia ka instalment kaba ar na ka Sorkar pdeng.
 ka Jaintia Hills Autonomous District Council (JHADC) Bah Thombor Shiwat, ha ka sngi Ba-ar, ula plie paidbah ia ka Jaintia Durbar Hall ka ban don lang ka Ophis treikam jong ki Dolloi ka Ri-lum Jaintia haba ki wan donkam sha Jowai.){kind=link}