Tyrwa ka Tnad Bording ban nang pynbun ia ki Sub Station ban lait thut ka jingsam bording ha Jylla

Shillong, Risaw 27: Ka tnad Bording kala phah ia ka jingtyrwa ia ka jingdonkam ban nang pynbun ia ki Sub-Station ha ka jylla.

“Ngi la phah ia ka jingtyrwa sha ka sorkar jylla bad nga la dep ruh ban iakren sani bha bad u Myntri Rangbah ka jylla ba ngi donkam shuh shuh ki Sub-Station ha ki jaka kiba kongsan” ong u Myntri ka tnad Bording u AT Mondal.

“U Myntri Rangbah ka jylla ula mynjur ban iarap ia ngi na ka bhah tyngka jong ka sorkar jylla ia ki ban sa ai ha ki bynta bynta, katba ngi dang ap ban ioh ia ka pisa na ka sorkar pdeng, ka ban shimpor da ki snem” ula bynrap.

U Mondal ula ong, ba ka jingbuh shuh shuh ia ki Sub-Station kan iarap shibun ha ki jaka kiba kongsan kiba u sainar sam bording u long uba jrong bad ba jngai bad ba don ka jingthud haka bording elektrik nalor ka jinghiar jong ka Voltage.

“Ngi dang pyrshang ban pynbeit iakitei ki jingeh namar ph ilah ban iohi ia ka jingdon jong ki sainar kiba jrong bha na kawei ka Sub-Station bad bun ki dei ki ‘Distribution Transformers’ kiba la pyniasoh bad katei ka lain. Lada kawei ka jaka ka shah ktah, kiwei ki jaka ruh ki shah ktah lang. Ngi dang iatrei halor katei ka bynta” ula ong.
Halor ka jingkylli, u Myntri Sorkar ula ong ba yn sa buh bun tylli ki Sub-Station lyngba ka jingbei tyngka ka ADB bad kiwei pat ki lad bei tyngka.

“Dang shen ngi lah plie kawei ha Sohiong constituency bad kawei ha Damlagre. Ngi dang dei ban plie ia kawei ka Sub-Station ha South West Garo Hills ha Purakashia, hynrei namar ba kala don noh ka jingshlei um, ki sainar kiba dei ban pynpoi ia ka bording kila shah rong noh ha ka um. Ngi lah pynkynriah noh ia katei ka jingplie ia ka Purakhasia substation, ha kaba u Myntri Rangbah u dei ban plie ha ka 8 tarik u Risaw” ula ong.

“Ngi dang khmih bniah bha ban peit ba bun ki Sub-Station ki dei ban sdang noh, bad ngi lah pynbor ia ki Contractors bad ia ki ophisarjong ngi kila trei palat ia ka por ka jongki ban peit ba kitei ki Sub-Station kidei ban treikam noh mardor” ula pynkut.