Wahiajer, Risaw 26: Da ki hajar ngut ki paidbah kila iatuid sha Wahiajer Multi Sports Complex Stadium ban sakhi ia ka jingiakhun hapdeng ka Shillong Lajong pyrshah ia ka7 Wasa United bad ha kane ka jingiakhun ka Shillong Lajong kala pynrem ia ka 7 Wasa United da 9-0 ha ka jingsdang ia ka 4th Meghalaya State League 2024 kaba la long hynne ka sngi Saitjain.
U Deibormame Tongper ula thep ia ka kol ha ka minit kaba 36, 45+2 bad 56 bad ula ioh ia ka hat-trick.
Kiwei pat ki nongialehkai ka Shillong Lajong kiba la ioh thep kol ki kynthup ia u Yohaan Benjamin ha ka minit kaba 16, Iohborlang L Lyngkhoi ha ka 18 minit, u Mebannangkiew Thabah ula thep kol ha ka 48 bad 50 minit, u Babysunday Marngar ula thep ia ka kol ha ka 90’+2 minit bad u Emanbha Marbaniang ula thep ha ka 90’+4 minit.
Ia kane ka Tournament la pynlong da ka Meghalaya Football Association bad la kyrshan pura da ka Department of Sports and Youth Affairs jong ka sorkar jylla.
U Symbud Myntri Rangbah ka jylla u Bah Sniawbhalang Dhar kum u Kongsan ha ka jingplie ia kane ka lympung ialehkai, ula ai khublei ia ka MFA kaba la pynlong ia ka jingplie ia ka jingiakhun hapoh ka Stadium bathymmai jongka Wahiajer bad na ka bynta ban kyntiew ia ka Football ha kylleng ka jylla.
“Ka Meghalaya mynta ka don bun tylli ki madan ialehkai artificial turfs, ki athletics track kiba katkum kane ka juk ba mynta bad kiwei kiwei ki jaka ialehkai” ong u Bah Sniawbhalang Dhar.
“Kane ka jaka kala long kum ka karkhana football bad kane kadei ban iai bteng. Ka Football kam dei tang ka jingialehkai ban long kiba bit ba biang ha ka bor met hynrei ka dei ruh ka lad ban kamai kajih bad kadei ka karkhana kaba heh mynta” ula ong.
U President ka MFA u Bah Hamletson Dohling ula ai khublei ia ka sorkar jylla kaba la ai ia ka jingkyrshan bad khlem ka jingkyrshan ka sorkar yn ym lah ban pynlong ia kane ka lympung iakob ialehkai football.
“Ka MFA ka dang trei shitom ban kyntiew ia ka Football ha kylleng ka jylla na ka bynta ka jingmyntoi jong ki samla” ula ong bad ka pynpaw baka Meghalaya Youth League bad ka jingkynthup shuh shuh ia ki District Sports Association.
“Ngi kwah ba ka Meghalaya ban pynmih ia ki nongialehkai kiba tbit bad ban long kum ka jaka ialehkai football kaba khlain tam” ula ong.
Ka jingiakhun haka sngi nyngkong kan sdang ha ka por 2 baje mynsngi bad ki kynhun kiban ialehkai ki kynthup:-
Group A (Tura): Chipakkore vs Atong Matgrik
Group B (Mawkyrwat): Mawten vs Khliehmawlieh
Group C (Tyrsad): no matches scheduled
Group D (Khliehriat): Rymbai Skhenshynriah vs Rangdajied United
Group E (Wahiajer): Seinbhalang Skhentalang vs Mawtari Myrdon
Group F (Shillong): Mawlai vs Seng Samla Mawmluh
