Shillong, Risaw 23: Ka Laitkor SC kaba dang shu kiew kyrdan shaka lympung OC Blue Shillong Premier League 2024 kala jop ha ka sien kaba nyngkong da kaba pynrem hynne ka sngi Balang ia ka Nangkiew Irat SC da 2-0 ha SSA Stadium, First Ground, Polo.
Ha ka por janmiet pat, ka Langsning FC kala pynrem ia ka Nongthymmai SC 3-2.
Baroh 4 tylli ki kynhun kiba ialehkai mynta ka sngi ki dei kiba la mad iaka jingrem haka jingiakhun ha ka sien kaba nyngkong hynrei kaba la kham sngewbynniaw eh ka dei iaka Laitkor kaba la rem lyngba ka Walk Over namar ka jingbym leit rejistar ia ki nongialehkai haka por kaba biang.
Hynrei ka Laitkor mynta ka sngi kala ialehkai bha da kaba pynrem ia ka Nangkiew Irat kaba ialehkai tang 10 ngut ki nongialehkai, ha kaba u Fridison Wanniang ula thep ia ka kol ha 60 minit bad u Banskhem Kharkongor ula thep ha ka minit kaba (90’+1).
Ka jingiakhun ha ka kylla step kala long laba iakhaid ha kaba ym shim la don kiba lah ban thep kol hynrei haka kylla miet ka Laitkor kala lah ban ialehkai bha ban ban thep 2 kol ban pynthikna shi syndon ban jop ha ka sien kaba nyngkong haka SPL.
Ha ka minit kaba 65 u nongialehkai jong ka Nangkiew Irat u Ronaldkydon Lyngdoh Nonglait ula shah beh na madan ialehkai da kaba ioh ia ka ‘Red Card’ namar ka jingleh tohmet (foul) bad wat u Coach Joseph Naik ula ioh Card namar ka jingpyrshah jur.
Ha ka jingiakhun hapdeng ak Langsning pyrshah ia ka Nongthymmai, u Michaelson Kurbah ula thep ia ka kol ha ka 20 minit na ka bynta ka Nongthymmai hynrei ha ka minit kaba 40 u Laldanmawia ula thep ia ka kol na ka bynta ka Langsning ban pynlong ia ka jingiakhun kaba iakhaid.
Ha ka minit kaba 47 u Dajiedlang Wanshnong ula thep ia ka kol na ka bynta ka Langsning bad ha ka minit kaba 61 u Ronald Singh Shaikhom ula thep ia ka kol lyngba ka jingshut penalty ban pyniakhiad biang.
Hynrei hashwa ban kut ka jingialehkai, u John Lalrinawma ula thep ia ka kol na ka bynta ka Langsning ha ka minit kaba (90’+1) kaba la pynthikna syndon iaka Langsning ban rah ia ka jingjop ia ka jingiakhun.
Ka jingiakhun ha ka sngi Palei kan long hapdeng ka Rangdajied United FC pyrshah ia ka Shillong Lajong FC ha ka por 2:30 mynsngi bad hadien kane ha ka por 5:30 ka Ryntih FC kan iakhun pyrshah ia ka Mawlai FC.
