Shillong, Risaw 23 : Ka Sorkar Jylla kala ai jingmynjur ia ka Ordinance ba teh kyndon ia ka Medical College shimet hapoh ka Jylla ban pule ia ka MBBS.
Ka Sorkar kala shim ia kane ka rai ha ka jingialang jong ka Kynhun Myntri bala pyniaid da u Myntri Rangbah ka Jylla Conrad K Sangma hynne ka sngi Balang ha Resubelpara, North Garo Hills.
Ia kane ka jingialang la pynlong sha Resubelpara kum shibynta jong ka “Cabinet on the move” jongka Sorkar MDA.
Haba iakren sha ki lad pathai khubor hadien ka jingialang, ka Myntri ka Koit ka Khiah Kong Ampareen Lyngdoh kala pyntip ba ka Kynhun Myntri kala ai jingmynjur ia ka Meghalaya Private Medical Institution (Regulation of Admission, Fixation of Fees and Reservation) Ordinance, 2024.
Ka Myntri ka pyntip ba ia kane ka Ordinance yn sap hah noh sha u Lat ka Jylla CH Vijayashankar ba un ai ka jingmynjur bad hadien bala ioh pdiang, yn sa pynmih jingpynbna ia ka. Ia kane ka Ordinance yn sa wanrah pat hapoh ka Iingdorbar Thaw Ain ha ka dur jong ka Bill ban pynlong ain.
Ka Kynhun Myntri kan sa iakynduh biang shen ban thaw ia ka Regulatory Body ka ban sa buh ia ka dor bai klas, ka jingpyn treikam ia ka Reservation Policy bad ka jingai bhah ia ki seat kat kum ki kyndon ka Sorkar bad ki hukum jong ki Iingkashari bapher bapher.
Ka Myntri ka iathuh ba ia kane ka Ordinance la hap ban ai jingmynjur namar ka Medical College shimet ba nyngkng eh ka Jylla-ka PA Sangma International Medical College jong ka University of Science & Technology, Meghalaya (USTM), kan sa sdang noh ia ka jingshim klas jong ka samoi pule 2024-25.
Ka USTM kala pynbna ba kan buh ia ka bhah ba 40 seat ia ki samla pule ka Jylla Meghalaya napdeng ki 150 seat. Kane ka Ordinance ka long eh ban buh teh kyndon da ka ain ia ka jingtreikam jong kane ka jaka pule bad kan pynthikna ruh ba ki samla pule na Meghalaya kin ioh ia ka concession ne ka jingpynduna ia ka dor bai klas hapoh kane ka jaka pule.
Ia mynta, ka Sorkar Jylla kala pynsted bha ia ki kam ban seng ia ka Shillong Medical College bad ka Tura Medical College, ki ban sa sdang ia ka jingpynrung klas MBBS naduh u snem 2025 bad 2026.
Ka Shillong Medical College kan sdang ia ka jingshim klas ia ki samla pule MBBS naduh u snem 2025-25 katba ka Tura Medical College kan sdang shim klas naduh u snem 2026-27.
