Hapdeng ka jingiakhih ki Nonghikai ba dawa pynkiew tulop
Shillong, Risaw 20 : Ka Sorkar Jylla kala bthah ia baroh ki nonghikai Samagra Shiksha Abhiyan (SSA) ba kin ai kyrteng man ka sngi haba wan sha skul (attendance) lyngba ka Teacher Information Management System (TIMS) Application.
Kane ka hukum ka dei kaba la pynmih da u State Project Director ka State Education Mission Authority of Meghalaya (SEMAM) Swapnil Tembe myn ha ka 15 tarik Risaw, kaba wan jia hapdeng ka jingiakhih jong ki nonghikai SSA ban dawa pynkiew tulop.
Ia kane ka hukum la pynmih da ka jingthmu ban wanrah ia ka jingtreikam/leit skul kaba thikna (accountability) jong ki Nonghikai SSA bad ka jingkhmih bniah da ki bor khmih ia ka jingshakri jong ki.
Kane ka hukum kala mih ruh halor ka nongrim ban lah leh eiei ia ka jingsngewkhia halor ka jingbym ai kyrteng thikna (attendance) jong ki nonghikai SSA haba leit skul, kaba la ktah ia ka jingtreikam kaba shai bad ka jingpyniaid ia ki kam ki jam.
Kat kum ka hukum, baroh ki nonghikai SSA hapoh ka Jylla ki dei ban ai kyrteng bad pyndonkam beit man ka sngi ia ka TIMS App ban aikyrteng haba ki wan skul. Ka jingpyndonkam ia kane ka App kan pynthikna ia ka jingbuh jingthoh ia ka jingpoi skul jong ki nonghikai, ka ban pyniasoh pat bad ka jingpyllait ia ka tulop lyngba ka Payroll & Employee Management System (PEMS).
“Ka TIMS App ka dei ka atiar ba kongsan ban pynthikna ba ki nonghikai ki don ha skul, bad ka iaid lang ia ka jingwan skul bad ka jingpyllait ia ka tulop ha ka por kaba biang” ong ka hukum.
La bthah ruh ia ki District Mission Coordination (DMC) ba kin leit ban jurip man ka por ia ki skul ban pynthikna ia ka jing bud ryntih ia kane ka jingbthah.
Ia kane ka hukum la phah ruh sha baroh ki Deputy Commissioner bad ki District Mission Coordinator ba kin pyntreikam mardor.
