Shillong, Risaw 20: U Myntri Rangbah ka jylla u Conrad K. Sangma ula plie ia ka Vocational Training Institute jongka Synod College, Shillong ha ka sngi Saitjain, kum shibynta jong ka jingrakhe ia ka Diamond Jubilee jong ka College.
Haba kren ha ka jingialang u Conrad ula iaroh ia ka Synod College kaba la shim ia kiba bun ki sienjam ha ki snem kiba la leit bad kala pynlong ia ki International Seminar, Conference bad kiwei kiwei bad kala ai jingmut bad phah ruh iaki jingtyrwa ia ka sorkar jylla halor ki ishu bapher bapher.
Haba kynmaw ia ka jingiadei kaba jan hapdeng u kpa jongu u (L) P.A. Sangma bad ka Synod College, u Myntri Rangbah ula ong, “Ka long kaba kongsan ba ngin pynkupbor ia ka jingmut jingpyrkhat ki samla jong ngi. Kiba bun ki kam bad ki sienjam kiba la shim da ka college kadei ban tei iaka jingmut jingpyrkhat jong ki samla bad ngi dei ban trei da ka jingmut ban pynmih ia ka bor na ki samla jong ngi”.
Ula kyntu ia ka college ba kadei ban shimkabu ia ka Meghalaya Skills Programme bad ula pyntip ba kiba bun ki kynhun ha ka jylla kila iateh bad ka sorkar jylla na ka bynta ka Vocational Training.
“Ka thong jongka Meghalaya Skills Programme ka long ban pynbiang ia ki jingai jinghikai bad ban batskhem. Ngi pynshlur ia ki jaka pule ba kin iateh lok bad ka sorkar bad ban ai jinghikai ha kaba iadei bad ka sap ka phong” la pynkut u Myntri Rangbah.
