Kynnoh pynkhein ka Tnad MLP ia ka Reservation Policy | Kiew kyrdan tang ki Garo bad bar Jylla ha ki Battalion

Shillong, Risaw 17 : Katba ka Jylla ka dang pynkhreh ban pynbeit thymmai ia ka State Reservation Policy bad ka jingtreikam jong ka Roster System, ka jingkynnoh kala mih ba ka Tnad Meghalaya Police, kala pynkhein ia ka bhah thungkam ha ka jingpynkiew kyrdan ia ki Pulit MLP Battalion khlem da burom ia ka bhah ki Khasi Jaintia.

Kane ka jingkynnoh kala mih na ki Pulit Battalion kiba la shah pynduh ia ka bhah ban kiew kyrdan kat kum ka hukum bala pynmih da ka Director General of Police (DGP) Kong Aida Nongrang myn ha ka 15 tarik Risaw 2024.

Kane ka jingpynkiew kyrdan ka dei ia ki Havildar jong ki 6 tylli ki MLP Battalion ka Jylla sha ka kyrdan AB Assistant Sub Inspector.

Kat kum ka hukum ba pynmih da ka DGP, ki don haduh 22 tylli ki kam AB-ASI bala pynkiew kyrdan ia ki Havildar jong ki MLP Battalion (1st MLP Battation-6th MLP Battalion). Napdeng kine ki post, haduh 16 tylli la jied tang ia ki Havildar Garo, 4 tylli sha ki bar jylla, kawei sha u Rabha bad tang kawei la ai sha u Havildar Khasi.

La ong ruh ba kane ka jingpynkiew kyrdan ka dei kaba la leh tang ia kito kiba la pynbna ba kila pass ia ka Senior Cadre Course ia kiba la ai jingmut ne phah kyrteng da ka Police Establishment Board (PEB).

Ki Havildar Khasi kiba la trei kham slem (senior) ban ia kine ki 22 ngut bad kiba shah pynduh ia ka lad ban kiew kyrdan, kila kynnoh ba kane ka jingpynkiew kyrdan ka dei kaba la shu leh hi ne jied beit beit tang da ka Police Headquarter.

Kila kynnoh ba ka jingkam ba ki dei kiba pass ia ka Senior Cadre Course ruh ka dei kaba shu jler namar kam shym la don satia kata ka course ne ka jingai jinghikai (training) ia ki Havildar ha ki Battalion na ka bynta katei ka kam.

Kila ong ba lada kane ka jingai bhah ka dei namar ka Roster System da kaba pyntreikam ia ka bhah jong ki snem bala leit noh, ka Police Headquarter kala dei ban pynshai.

Kila kyntu ia ki bor ka Sorkar Jylla ba kan tuklar lem halor kane ka jingpynkiew kyrdan bad ban pynbeit noh mardor khnang ba kan ym long ka jingkhanglad ne jingpynduh ia ka hok jong ki Hahildar Khasi kiba dei hok ban kiew kyrdan.