Aizawl, Risaw 17 : Ki shipai Assam Rifles kila ioh ban kurup ia u droks bapher bapher, uba shongdor haduh T.66.27 klur bad kem ia 7 ngut ki nongkhaii kynthup 2 ngut ki nong Myanmar ha kine ki artaiew bala lah.
“Ha ka jingkhynra bala pynlong ha ki 5 tylli ki jaka, ki shipai kila ioh kurup haduh 331 gram u heroin, 22.309 kilo u methamphetamine tablet, 7.6 kilo u ganja bad 90 lak ka pisa india” ong ki heh shipai.
Ki pyntip ba 5 ngut ki nong India bad 2 ngut ki nong Myanmar kila shah kem haba iadei bad kane ka jingioh kurup ia kine ki jingdih buaid.
Ka jingkhaii tuh ia u droks khamtam u heroin bad methamphetamine table ba ju tip kum u dawai kuli yaba, sha India kala kiar bha hadien ka jingknieh ki bor shipai ia ka synshar khadar ha Myanmar naduh u Rymphang 2021.
Ka Mizoram, Southern Assam bad Tripura kila kylla long ki jaka rong jong u drugs namar kine ki lai tylli ki Jylla ki don ia u khappud bad ka Myanmar lem bad ka Bangladesh.
Ki Pulit kila register case halor kane ka jingkurup droks hapoh ka kyndon Narcotics Drugs and Psychotropic Substances (NDPS) Act 1985.
