Shillong, Lber 16: U Vice President ka Ri India, u Jagdeep Dhankar, u la iaroh ia ka “Meghalaya Model of Development” na ka bynta ka “Meghalaya kaba la roi ha u snem 2032” hynrei u la maham ruh ba ka jinglong ka Jylla kaba la roi kam dei kaba suk namar ka donkam ia ki katto katne ki bynta, kiba shim por.
Haba leit jngoh ïa ka IT Park kaba don ha Mawdiangdiang bad hadien ka jingioh ia ka jingbatai kaba bniah na u Myntri Rangbah ka Jylla Conrad K Sangma halor ki sienjam ba shakhmat ia ka Meghalaya ba kan long ka Jylla kaba kiew hapoh u 2032, u Vice President u la ong ban long ka Jylla ba la kiew ka dei ka kam kaba khia bad ka jingkiew jong ka GDP kam dei ka dak jong ka.
“Ka kyrdan ba la kiew ka don katto katne ki bynta bad ki dei kiba shim por bad ka Meghalaya hapoh ka jingialam u Conrad K Sangma ryngkat ki 10 tylli ki jingkular, ka dei kaba thmu ban pynlong ia ka Meghalaya kum ka jylla ba la kiew,” u la ong.
U la pynpaw ba ka long kaba kongsan kumjuh ban shim khia ia ka jingdon jong ki marpoh khyndew bad ka jinglah jong ki briew ban trei ban ktah katba dang angnud ban long ka jylla kaba la kiew.
U Vice President u la ai jingmut ruh ba ka jingroi jingpar ki katto katne ki bynta ki dei kiba hap ban kiew hi kum ki surok, ka jingpyniasoh bad kiwei kiwei hynrei ka jingkhmih lynti sha ka lawei ha kaba thaw ia kine ki jingtei ruh ka long kaba donkam ban buh ha ka jingmut.
Ha kajuh ka por, u la pynpaw ïa ka jingkmen ba watla ka jingangnud ka don ban long ka jylla kaba la kiew, ka jingpyrkhat jong ka Meghalaya ka long halor ki mat ba kongsan kum ka pule puthi, ka koit ka khiah, ka teknoloji, ka jingpynroi ïa ki sap, ka rep ka riang, ki kam ïalehkai, ka rwai ka siaw bad kiwei kiwei.
Shwa ia kane, u Myntri Rangbah ka Jylla Conrad K. Sangma u la kren halor ka mishon ban pyntyllun ia ka roi ka par hapoh ka Jylla. Ula pyntip ba ka Sorkar Jylla kala ithuh ia ki katto katne ki bynta kiba kongsan ban lah kynjoh ia ka thong ha kaban pynlong ia ka “Meghalaya kaba kiew hapoh u 2032” , ka por ba ka jylla kan rakhe ia ka jingdap 60 snem ka jingioh Jylla ba pura.
U la ïathuh ha u Vice President ba ia ka “Meghalaya Model of Development” la buh ha ka nongrim jong ki saw tylli ki paia – ban wanrah ïa ki jingangnud, ka jingïatreilang bad ki paidbah bad ki kynhun bapher bapher, ka jingkyntiew ïa ka bor treikam bad ka jingwanrah ïa ka jingïatreilang.
Haba kdew ïa ki jingeh jong ki 7000 tylli ki shnong ha ka jylla, kibadon sha ki jaka nongkyndong ba jaka riat, u Myntri Rangbah u la ong, “Ngi la ithuh ïa ki jingsngewkhia bad ki jingeh jong ka jylla bad ngi la pynïaid ïa ki prokram ban ai jingmyntoi ïa ki samla, ki kynthei bad ki nongrep. Ngi la iaid shakhmat ban kyntiew ka ioh ka kot jong ka jylla.”
U la ong ba ka GSDP jong ka jylla ka long kaba duna bha ban ia ka national average shwa u snem 2020-21, hynrei hadien u snem 2021-22 ka jylla ka la iohi ia ka jingkiew kaba 15 percent, ha kaba ka jingkiew ha ka jingbei tyngka ha ki bynta bapher bapher jong ka imlang sahlang, ka jinglum khajna nalade ka la kiew, ka jingpyntreikam ia ki khajna ka Sorkar Pdeng, bad ka jingioh pisa na ka Finance Commission kaba 15 kynthup ia ka jingbei tyngka lyngba ki Projek ba la iarap nabar (EAPs).
U la pyntip ruh ba ka jingheh jong ka mang tyngka ka jylla ka la kiew na ka T.12,000 klur sha ka T. 25,000 klur mynta. U la ong shuh shuh ba ka jingpynlut pisa ka la kiew da 2.75 sien, nalor kiwei pat ki sienjam ba la shim da ka sorkar ban pynsted ia ka roi ka par.
