Shillong, Risaw 16: Namar ka jingbym hun iaka jingiakren bad u Myntri ka tnat Pule Puthi, Rakkam A Sangma, ki Nonghikai SSA kila rai ban bteng beit iaka jingiakhih daka ba shong kyllain mungor khlem buhpor ha Madan Malki.
Lah ban kdew ba ki Nonghikai SSA hapoh ka shatri All Meghalaya SSA School Teachers Association (AMSSASTA) kila sdang iaka jingiashong kyllain mungor naduh 1 tarik Risaw ha Madan Malki, ban dawa naka Sorkar Jylla ba kan pynkiew noh ia ka tulop jong ki 13000 tamki nonghikai SSA da 100% .
Hynne ka step u Rakkam A Sangma u la khot iakren ia ka AMSSASTA hynrei hadien ba wai ka jingialang, ki Nonghikai kila pynpaw ba kim hun satia iaka jingiakren bad u Myntri, watla u la pyntip ba ka tnat kala pynkhreh ia ki lad ki lynti ban leh eiei halor ki mat jingdawa jong ki nonghikai SSA.
U Vice President ka AMSSASTA Bah Defender S Lamare, u la iathuh ba haka jingialang, u Myntri ka tnat Pule Puthi u la pyntip ba ka Sorkar kala shim khia bha haba iadei bad ki jingdawa jong ki nonghikai SSA.
Ula iathuh ba u Mytnri u la pyntip ruh ka tnat kan shimpor ban rai eiei halor ka jingdawa jong ki Nonghikai namar iaki mat jingdawa jong baroh ki nonghikai, la aiti ban bishar da ka State Education Commission.
“Ka tnat pule puthi ka dang ap iaka kaiphod naka State Education Commission bad hadien kane, ka tnat kan sa lah ban rai eiei halor ka jingdawa jong ngi” pyntip u Bah Defender.
Haba kylli u Bah Defender u la kubur ba ki Nonghikai ki donkam ban leit phai shala ki skul, ki khynnah ki donkam ban shah hikai khamtam mynta baka eksamin kala jan hynrei kim banse ban mih sha surok ban dawa iala ka hok.
“Hoid haduh mynta ngin iai bteng beit iaka jingiakhih. Ngi kyrpad iaki para Nonghikai ban ai ka jingkyrshah iaka jingiakhih jong ngi namar ka jingiakren ka dang iaid bad ka Sorkar ruh kumjuh ka dang leh iaki jingdonkam. Ngi ap iaka rai jong ka Sorkar namar u Myntri u la pyntip ba haki sngi ban wan, ka tnat kan sa ai ia ki jingtip” u la ong.
U Myntri ula ong “Nga la iakynduh ia baroh arkynhun ki nonghikai SSA. Nga la kyrpad ia ki ban ai por shuh shuh ia ka Sorkar ba kan pynkhreh ia ka formula ha kaban pynbeit ia ka jingdawa jong ki” ong u Rakkam Sangma.
Haba kylli, u Myntri ula pyntip ba ka Sorkar Jylla kan hap ban pynlut sa palat T.300 klur ban pynkiew ia ka tulop jong ki palat 13000 ngut ki nonghikai SSA badbynrap “Lada ngi shimti noh ma ngi (pynrung ia ki nonghikai SSA hapoh ka Tnad Pule Puthi), ngi hap ban ai ia ki da ka scale pay bad lada ngi leh ia kane, ngi lah ban donkam sa T.130 klur ban pynlut”.
“Kumta, ngi la wad ia ki lad ki lynti ban leh ia kaei kaba bha tam na ka bynta ka jingmyntoi ki nonghikai” ula ong.
Halor ka rai ka AMSSASTA ban kyntait ia ka jingkyrpad ha kaban weng noh ia ka jingiakhih, u Rakkam ula ong “Ai ba kin bteng kat kaba ki mon namar kumba nga ong, ka Sorkar ka dang donkam shuh shuh ia ka por hashuwa ba kan shim rai ia kum kane ka kam kaba kongsan”.
