Shillong, Risaw 16: Ka Sawmer SC ka la sdang ïa ka OC Blue Shillong Premier League 2024 da ka jingjop da 3-2 kol pyrshah ïa ka Nangkiew Irat SC ha ka jingialehkai ba la pynlong ha SSA First Ground, Polo.
Ka Sawmer ka la tam lypa da 3-0 kol haduh ka minit kaba 56 hynrei ka Nangkiew Irat kala lah ban pynphai 2 kol bad kane kala pynlong ïa ki minit ba khatduh jong ka jingïalehkai kaba itynnad haduh katta katta.
Ka jingbakla ki defender ka Nangkiew Irat ka la pynduhnong iaka kynhun ha kaba u Diego Khyriem (6’) u la thep ïa ka kol ba nyngkong kaba dei ruh ka gok baka Sawmer ka ioh thep haka kylla step. Ka la don ka jingpyrta Handball hapoh ka Penalty Box ka Nangkiew Irat hynrei u referee um shym la iohi satia.
U Hilford Lyngkhei u la thep ïa ka kol kaba ar ha ka 49 minit bad u Orestar Sad ula ioh thep ia ka kol kaba lai ha ka 56 minit, kaba la pynlong iaka Sawmer ban tam 3-0 kol.
Haka minit ba 70, u Isak Vanlalpeka u la lah ban thep ia ka kol ba nyngkng naka bynta ka Nangkiew Irat bad haka minit ba 78 lah thep biang sa u Wanpynshngain Nongsteng ia ka kol kaba ark aba la pynlong iaka jingiakhun ban neh 3-2.
Hashuwa kane, ka jingïakhun sdang jong kane ka samoi ïalehkai OC Blue Shillong Premier League 2024 hapdeng ka Laitkor SC kaba dang shu kiew kyrdan pyrshah ïa ka Nongrim Hills SC, ka khlem lah ban long satia namar ka Laitkor ka khlem lah ban pyndep ia ka jingpynrung kyrteng ia ki nongialehkai lyngba ka Central Registration System jong ka All India Football Federation (AIFF) hashuwa ka por. Namar kane, ka SSA kala rai ban pynbna jop ia ka Nongrim Hills da ka walkover.
Da ka jingkiew kyrdan bad jingithuh jong ka OC Blue SPL ha ka ri baroh kawei, ka Shillong Sports Association (SSA) ka la rai ban pyntreikam ïa ka CRS na ka bynta ban pynrung kyrteng ïa ki nongïalehkai ha kane ka lympung mynta u snem.
Ka SSA kala pyntip ia kane sha ki kynhun lane Club la katto katne bnai shwa ka aiom ialehkai bad la ai jinghikai ban batai pura ia ka rukom pynrung kyrteng.
Ka Nongrim Hills ka la ioh ia ka nam jop da 3-0 kol.
Ha ka 17 tarik ka jingialehkai ka long hapdeng ka Nongthymmai SC pyrshah ïa ka Ryntih FC ha ka por 11:50 baje mynstep, ka Langsning FC kan iakhun pyrshah iaka Shillong Lajong FC ha ka por 2:45 baje janmiet.
