Shillong, Risaw 08: Haduh 1354 ngut kila shah ithuh kum ki ‘Duplicate Electors’, namar ka jingpynrung kyrteng ha ki ar tylli ki jaka, katba 23161 ngut kila shah pynbna ba ki dei kiba la khlad noh ne ‘expired’ kat haduh ka 8 tarik u Risaw.
Ia katei la pynbna da u Chief Electoral Officer (CEO) ka jylla u BDR Tiwari haba pynbna shaphang ka Special Summary Revision jong ka Electoral Roll 2025 hynne ka sngi Baar.
Na ki 22,41,984 ki nongthep vote haduh ka 8 tarik u Risaw, la shem ba kila don 8, 21,79,106 ki nongthep vote kiba biang hadien ka jingkhmih bniah, la iathuh u Tiwari.
Ka jingleit pynshisha ia man la ki longing kaba la pyndep, kala kot sha ka 97.20%, ula bynrap.
Kum shi bynta jongka SSR 2025, u CEO ula lum ia ka jingialang bad ki seng saiñ pyrthei hynne ka sngi bad ula ong ba ka jingialang bad ki seng saiñ pyrthei bad baroh ki District Election Officer (DEO) kan long man la ka por haduh ban da pynmih ia ka electoral roll kaba pura.
Yn sa ai ei mardor ar kopi ia ka Draft Electoral Roll bad ia ka Final Electoral Roll sha ki seng saiñ pyrthei kiba la ioh jingithuh ha ki jingialang paidbah.
U Tiwari ula ong ba katkum ka polisi treikam kaba mynta jong ka Election Commission of India, ka Annual Summary Revision kadei naduh ka shi tarik u Kyllalyngkot jong u snem ban wan bad nangne la bteng ban pynrung bad pynbeit ia ki kyrteng ha ka electoral roll bad ia ka thup kyrteng kaba pura la leh ha ka taiew kaba nyngkong jong u bnai Kyllalyngkot jong u snem ban wan.
Katkum ki kyndon jongka Section 14 ka Representation of People Act, 1950, 4 tylli ki ‘Qualifying Date’ (1 tarik u Kyllalyngkot, 1 tarik u Iaiong, 1 tarik u Naitung & 1 tarik u Risaw) ki long kiba lait, kumta ia ka Annual Summary Revision la pynlong da kaba phaikhmat sha ka 1 tarik u Kyllalyngkotjong usnem ban wan kum ka Qualifying date, ha ryngkat bad ka shim ia ka Advance Application na ka bynta ki 3 tylli ki Qualifying Date kaba dei ka 1 tarik u Iaiong, 1 tarik u Naitung & 1 tarik u Risaw jongu snem.
“Ka Commission kala rai ban iaid shakhmat bad ka Annual Summary Revision da kaba shim ia ka 1 tarik u Kyllalyngkot 2025 kum ka Qualifying Date habaroh ki jylla bad Union Territory lait noh ia ka Haryana, Jharkhand, Maharashtra bad ka UT jongka Jammu & Kashmir, ha kata ka rukom ba ia ka Electoral Roll la pynmih pura hashwa jong ka National Voters’ Day (January 25 man la u snem) khnang ba ia ki EPIC kiba la pynmih thymmai na ka bynta ki nongthep vote kiba dang don (18-19 snem) yn lah ban sam ha ki jingialang jong ka jingrakhe ia ka NVD,” ula ong.
Ula ong ba kila don ar tylli ki bynta ba la pynlong ia ka Revision Exercise jong ka Electoral Roll, kaba kynthup ia ka pre-revision bad ka revision, u CEO ula ong ban aka bynta ka jingthmu ban ioh iaka electoral roll kaba bha, la khein kongsan bha ia ka jingleh ia ka pre-revision bad ia ka revision.
Ha kaba iadei bad ka special summary revision jongka electoral roll 2025, u CEO ula ong, ba hapoh jongka pre-revision, ia ka House to House (H2H) Verification ne ka jingleit pynshisha ha ki iing ki sem lyngba ki BLO, jingpynbeit biang ia ki jaka thep vote, ban weng ia kino kino ki jingduna ha ki electoral roll/EPIC (nuksa haba iap, duplicates, jingkynriah ki nongthep votebad kiwei kiwei) bad jingpynbha ia ka jingshon iaka dur, haba donkam kano kano ruh, la sdang naduh ka 20 tarik u Nailar bad kan kut ha ka18 tarik u Risaw. Ka jingpynkhreh ia ka Integrated Draft Roll da kaba shim ia ka 1 tarik u Kyllalyngkot 2025 kum ka Qualifying Date yn pyndep ha ka 28 tarik u Risaw.
Ha kaba iadei bad ka jingpynbeit biang ne ka Revision, ula ong ba ia ka jingpynmih ia ka Integrated Draft Electoral Roll kna long ha ka 29 tarik u Risaw, ka jingphah ia ki jingkam bad jingpyrshah kan long naduh ka 29 tarik u Risaw haduh ka 28 tarik u Naiwieng, kan don ruh ka tarik ban pynlong ia ka Special Campaign ha ka 15 bad 16 tarik bad 21 bad 22 tarik u Naiwieng, ka jingpynkut noh ia ki jingkam bad jingpyrshah hapoh jong ka 24 tarik u Nohprah bad ka jingpynmih ia ka Final Electoral Roll kan long haka 6 tarik u Kyllalyngkot 2025.
