Nongpoh, 08 Risaw: U MLA ka Jirang Bah Sosthenes Sohtun, ha ka sngi Ba-ar, u la leit jurip ia ki 5 tylli ki longiing Khasi kiba don ha shnong Nongspung-B, kiba la shah pynjulor na ka jingtih lum jong uwei u briew uba dei u Naga.
Kine ki longiing ki ei jong ka kong Premika Sungoh, Lijanta Sungoh, Kerning Sungoh, kong Manar Suting bad kong Wompher Dhar.
Na ki 5 tylli ki longiing, kaba la kham palat ka jingujlor ka dei ia ka iing jong ka Kong Premika Sungoh, kaba la hap ban mih noh na la iing ha ryngkat ki khun, namar ka iing kaba ki shong ki sah, ka la shah tap ha ka khyndew ktieh, kaba la wan tuid na ka jaka tih khyndew jong u Naga.
Na ka liang u MLA u la kular ba un pynioh ia ki lad jingiarap na ki bor sorkar bad ban pynkren sha ka ophis u Deputy Commissioner bad ruh sha ophis u BDO Umling Block, khnang ba kitei ki longiing kin ioh ia ka jingiarap kaba kham kloi.
U MLA u la pynpaw ruh ia ka jingsngewkhia halor kane ka jingtih lum bad ong ba kum kane ka jingjia ia kine ki longiing, kam dei ban jia shuh nangne shakhmat.
U MLA u la noh synniang ruh da ka pisa sha kitei ki longiing.
