Shillong, Risaw 05 : Ka Nongkseh Sports Social & Cultural Club (SS&CC) hynne ka sngi Thohdieng, kala pyllait paidbah ia ka jersey ban ialehkai hala iing bad shabar (Home & Away) na ka bynta ka lympung ialehkai First Division 2024 jong ka Shillong Sports Association (SSA).
Ia kane ka jingpyllait jersey la pynshongkun da u kongsan Myrank Thangkhiew, Rangbah Shnong ka Nongkseh, Raid Saw Kur ha ryngkat ki kynrem ki lyndan ha ka jingiadonlang ki dkhot ka Executive Committee ka Dorbar Shnong Nongkseh, ki rang ialehkai bad ki bor pyniaid ka Club.
Nalor ane, ka Club kala pyllait paidbah ruh ia ka Anthem ha kane kajuh ka jingialang.
Ka Nongkseh SS&CC ka dei kaba la seng ha u snem 1969 bad ka dei kawei na ki club phutbol bala rim bha ka Nongbah Shillong. Ka Club kala iashimbynta shitrhem bha ha ka SSA League bad mad ia ki jingjop bad jingshah rem ha ki snem bala leit noh. Kane ka club kala kiew ruh haduh ka Super Division League (mynta bala tip kum ka Shillong Premier League) bad kala mad ruh ia ka jinghiar shaduh ka kyrdan Third Division.
Hynrei, ka Club kala mad ia ka jingkiew sted hapoh ka jingialam jong u President ba thymmai Bah Daniel M Thangkhiew bad General Secretary Marbiangdor Thangkhiew. Tang ha kine ki arsnem, ka Club kala mad ia ka jingkhie rasong bad ioh jaka sha ka Second Division bad mynta u snem pat kala kiew sha ka First Division.
Shuwa ban sdang kane ka samoi ialehkai First Division ba mynta, ka Nongkseh SS&CC kala soi thymmai ia ki katto katne ki rang ialehkai ba tbit bad ba kynsai.
Ia kane ka samoi mynta, ka Club kan dei kaban ialam da u Rang ialehkai barim ka I-League Cheterpaul Lyngdoh kum u Captain bad u Armanki Kharkongor kum u Vice-Caotain, uba ialehkai na ka Nongthymmai SC ha ka Shillong Premier Leaque.
 hynne ka sngi Thohdieng, kala pyllait paidbah ia ka jersey ban ialehkai hala iing bad shabar (Home & Away) na ka bynta ka lympung ialehkai First Division 2024 jong ka Shillong Sports Association (SSA).){kind=link}