Shillong, Risaw 03 : Ka Sorkar Jylla kala phah haduh 10 ngut ki doktor ban leit pule pyntbit ha ka Psychiatric bad De-addiction Treatment sha Tezpur, Assam.
Kane ka long shibynta na ka rai jong ka Sorkar ban pynjanai ia ka jingtreikam ka Detox Centre ha Shillong Civil Hospital, Jowai Civil Hospital, Nongstoin Civil Hospital, Baghmara Civil Hospital bad Tura Civil Hospital- ban iarap iaki nongdih droks ba kin ioh ia ki lad jingsumar hashuwa ba kin leit sha ki Rehabilitation Centre.
Haba pyntip ia kane ha ka sngi Palei, ka Myntri ka Koit ka Khiah Kong Ampareen Lyngdoh kala ong ba kala dep shong ia ka jingialang bishar kam halor ki jaka drugs-Addiction hapoh ka Jylla Meghalaya.
“Ha ryngkat ka Tnad Social Welfare kat kum ka DREAM Project, mynta ngin sdang ban buh noh ia ki jingdonkam baroh ban ai jingsumar ne ban pynkhuid ia u droks na ki nongdih” kala ong.
“Ka Tnad ka Koit ka Khiah kala phah kumba 10 ngut ki doktor dang shen ba kin leit pule pyntbit ha ka Psychiatric treatment bad De-addiction treatment sha Tezpur, Assam. Kine ki Doktor ki dei kiba dang shu pyndep ia ka jingpule bad ki dei kiba dang shu wan phai sha Jylla Meghalaya” ong ka Myntri haba bynrap “Phi lah ban kular ia ka Jylla bad ki nong shongshnong jong ka ia ka pyrthei. Phi lah an ong hooid ngi lah ban don ia baroh ki tiar sumar ia kiba dih droks ha kylleng ka Jylla hynrei phim don pat ia ki doktor kiba donkam ban sumar. Kumta ngi la phah ia ki doktor ban leit pule pyntbit”.
Ha kajuh ka por, ka Myntri kala pyntip ba ka Sorkar kala phaikhmat sha ki lad ki lynti ban pynjanai ia ka jingtreikam jong ki detox centre ha Shillong Civil Hospital, Jowai Civil Hospital, Nongstoin Civil Hospital, Baghmara Civil Hospital bad Tura Civil Hospital.
“Mynta ngin pyrshang la kumno kumno ruh ha man ki District Headquarter ban pynkhuid shuwa ia kiba dih droks hashuwa ba kin leit sha ki Rehabilitation. Ngi hap ban pynkhuid shuwa. Phim lah satia ban shu phah ia kiba la kyrni sha ki Rehabilitation Centre lada kim pat pyndep ia ka por ba pynkhuid ia u droks” kala ong.
